Elimizdiń qaı salasynda mamandar jetispeıdi
ASTANA. KAZINFORM — Qazir eldegi elektrondy eńbek bırjasy portalynda 65 myń bos jumys oryny bar. Bul týraly «JibekJoly» arnasyndaǵy «BúginLive» baǵdarlamasynda EHÁQM halyqty jumyspen qamtý departamentiniń bas sarapshysy Nysanbaı Sısen málimdedi.
Búgingi tańda elimizde elektrondy eńbek bırjasy portalynda 64,1 myńǵa jýyq bos jumys orny jarııalanǵan. Onyń ishinde bilim berý salasy kósh bastap tur. 10,1 myń maman qajet. Odan keıin óndiris salasyna 9 myń jumysshy jetispeıdi. Al, medıtsına salasynda 6 myń bos oryn bar.
Onyń sózinshe, bul tizim bilim berý salasyna tek muǵalimder ǵana qajet degendi bildirmeıdi. Mektepter men JOO-daǵy tehnıkalyq maman ıeleri de tizimge kiredi. Eldiń keıbir óńirlerindegi bos jumys oryndaryn qamtý úshin mınıstrlik iske bilek sybana kirisken.
— Bilikti mamandardy daıarlaýmen Oqý-aǵartý jáne Ǵylym jáne joǵary bilim mınıstrligi birlese aınalysady. Al, Eńbek mınıstrligi jetispeıtin kadrlarǵa boljam jasaıdy. 2025-35 jyldar aralyǵynda 2,9 mln jumys qoly qajet bolady degen boljam bar. Onyń 817 myńy jumysshy mamandar. Al, joǵaryda aıtylǵan mınıstrlikter osy boljamǵa sáıkes maman daıyndaıdy, — dedi ol.
Biraq, byltyrǵymen salystyrǵanda salada edáýir ósim bar eken. Byltyr jalpy sany 1 mln-ǵa jýyq bos oryn bolǵan. Bıylǵy kórsetkish 800 myńnan sál asady.
«JibekJoly» arnasyndaǵy «BúginLive» baǵdarlamasynyń efırine kórermen habarlasyp, dıplom boıynsha jumys taba almaı júrgenin jetkizdi. Al, sala mamany buǵan qatysty bylaı dep pikir bildirdi.
— Muǵalimderge mamandyǵy boıynsha mektepke ornalasý úshin mindetti túrde biliktilik sanatyn alý kerek. Ol sanat alynbaǵan jaǵdaıda, ol kisi qalaǵan jumysyna bara almaıdy. Osyǵan oraı habarlasqan kórermenge aıtqym keledi, eger qolynda arnaıy sertıfıkaty bolsa, onda bizde Shymkent qalasynda mansap ortalyqtary jumys isteıdi. Sol ortalyqqa júginse bolady, — deıdi Nysanbaı Sısen.
Mamandardyń málimetinshe jyl basynan beri 600 myńnan astam adam jumysqa ornalasqanymen, keı óńirlerde eńbek resýrstarynyń tapshylyǵy áli seziledi.
Aıta ketelik Qazaqstanda jasandy ıntellekt qansha jumys ornyna yqpal etetini týraly jazǵan edik.