Elimizdiń qaı óńirinde jańa stadıon salynyp, eskileri jańartylady
ASTANA. KAZINFORM – Osy jyldyń naýryzynda Býrabaıda ótken Ulttyq quryltaıdyń 4-otyrysynda Memleket basshysy Qasym-Jomart Toqaev elimizde fýtboldy damytý máselesine nazar aýdartqan bolatyn.
- Elimizde fýtboldy damytýǵa basa mán berý kerek dep sanaımyn. Demeýshiler qarjysy esebinen oblystyq stadıondardyń kópshiligin jańǵyrtý qajet nemese jańa fýtbol stadıondaryn salýdy qolǵa alǵan jón. Bul máseleni baqylaýda ustaımyn, - degen edi Prezıdent.
Osyǵan oraı Sport jáne týrızm mınıstrligine saýal joldap, elimizdiń qaı óńirinde jańa stadıon salynyp, eskileri jańartylatyndyǵyn surap bilgen edik.
Sonymen vedomstvo málimetinshe, respýblıkada 28 negizgi stadıon jumys isteıdi. Bul rette 14 jańa stadıon salý qajet. Jumys istep turǵan 11 stadıon jóndeýdi nemese qaıta jańartýdy talap etedi.
Jalpy, búginde 9 stadıon salý úshin qajetti is-sharalar júrgizilip jatyr. Onyń ishinde myna eki nysannyń qurylys jumystary qolǵa alynǵan:
- Qyzylorda qalasynda 10 myń oryn trıbýnasy bar (jer ýchaskesiniń aýdany - 0,75 gektar) stadıon, aıaqtalý merzimi - 2025 jylǵy shilde;
- Astana qalasynda (Q. Muńaıtpasov atyndaǵy) shamamen 3 600 oryn (jer ýchaskesi - 2,19 gektar) trıbýnalary bar, jumystar júrgizilip jatyr. Qurylys jumystarynyń aıaqtalý merzimi - 2026 jyldyń І toqsany.
Sonymen qatar myna qalalarda 7 stadıon boıynsha jobalyq-smetalyq qujattama ázirleý qolǵa alynǵan:
- Aqtóbe qalasynda 35 myń oryndyq, jer ýchaskesiniń aýdany - 25 gektar, saraptama qorytyndysyn alý merzimi - 2025 jylǵy jeltoqsan;
- Petropavl qalasynda (Bereke shaǵyn aýdanynda) ÝEFA-nyń úshinshi sanatty 5 000 oryndyq fýtbol arenasy (fýtbol akademııasymen), jer ýchaskesiniń aýdany - 10,0 gektardan astam, saraptama qorytyndysyn alý merzimi - 2025 jylǵy jeltoqsan;
- Atyraý qalasynda 12 myń oryndyq, jer ýchaskesiniń aýdany - 9,9 gektar, saraptama qorytyndysyn alý merzimi – osy jyldyń qyrkúıegi;
- Aqtaý qalasynda 10 myń oryndyq, jer ýchaskesiniń aýdany - 12 gektar, saraptama qorytyndysyn alý merzimi - 2025 jylǵy jeltoqsan;
- Shymkent qalasynda 35 myń oryndyq, jer ýchaskesiniń aýdany - 20,1 gektar, saraptama qorytyndysyn alý merzimi - 2025 jylǵy jeltoqsan;
- Semeı qalasynda 12,5 myń oryndyq, jer ýchaskesiniń aýdany - 5,84 gektar saraptama qorytyndysyn alý merzimi - 2025 jylǵy jeltoqsan;
- Óskemen qalasynda 5 myń oryndyq jabyq stadıon, jer ýchaskesiniń aýdany – 9,8 gektar, saraptama qorytyndysyn alý merzimi - 2025 jylǵy qyrkúıek.
- Jobalaý-smetalyq qujattamany ázirleý jergilikti bıýdjetterden qarjylandyrylady. ÝEFA talaptaryna sáıkes keletin 5 jańa stadıon salýǵa qatysty (10 myń jáne odan da kóp oryndyq trıbýnalary bar) másele boıynsha sheshim qabyldaý satysynda tur, - dedi mınıstrlikten.
Mınıstrlik Astana qalasynda quny 13 mlrd teńge bolatyn 30 myń orynǵa arnalǵan «Astana-Arena» jáne Petropavl qalasynda quny 1,6 mlrd teńge bolatyn «Qarasaı» stadıonyn (2-kezeń) jańartý jumystary aıaqtalǵanyn atap ótedi.
Munan bólek, jeke ınvestorlar esebinen eki qalada stadıon salý úshin jobalyq-smetalyq qujattar ázirlengen. Naqtyraq aıtqanda, Oral qalasynda (Atoıan atyndaǵy) 8 320 oryndyq jáne Aqtaý qalasynda («Jas Qanat») 3 275 oryndyq trıbýnalary bar stadıon qurylysyna memlekettik saraptamanyń oń qorytyndylary alynǵan.
Sondaı-aq Atyraý qalasyndaǵy «Munaıshy» stadıonyn rekonstrýktsııalaýǵa jáne Almaty qalasyndaǵy Ortalyq stadıondy jańartýǵa jobalaý-smetalyq qujattama ázirlenip jatyr.
Al Shymkent (Q. Muńaıtpasov atyndaǵy stadıon), Qaraǵandy («Shahter»), Óskemen («Shyǵys»), Jezqazǵan («Metallýrg»), Pavlodar («Ortalyq») qalalarynda stadıondarǵa qatysty jobalaý-smetalyq qujattama aldaǵy ýaqytta ázirlenbek.
Aıta ketsek, jýyrda Memleket basshysy elordada jeke ınvestordyń qarjysyna salynyp, bıyl paıdalanýǵa berilgen Bekzat Sattarhanov atyndaǵy sport keshenin aralap kórdi.