Elimizdiń qaı óńirinde týrıster sany basym
ASTANA. KAZINFORM – 2025 jyldyń birinshi jartyjyldyǵynyń qorytyndylary boıynsha Qazaqstannyń týrızm salasynda turaqty oń kórsetkishterge qol jetkizildi. Bul týraly Ortalyq kommýnıkatsııalar qyzmetinde ótken baspasóz konferentsııasynda QR TSM Týrızm ındýstrııasy komıtetiniń tóraǵasy Káripbaev Nurtas Ǵalymuly habarlady.
Onyń málimdeýinshe, ishki týrızm belsendi túrde damyp keledi.
— Іshki týrızm boıynsha ornalastyrý oryndarynda qyzmet kórsetilgen azamattardyń sany 3,9 mln adamǵa jetti. Bul ótken jyldyń sáıkes kezeńimen salystyrǵanda 500 myńǵa kóp. Іshki týrıster sanynyń aıtarlyqtaı ósýi ásirese Almaty oblysynda (+56%), Qyzylorda oblysynda (+54%) jáne Aqtóbe oblysynda (+40,8%) tirkeldi, — dedi N.Káripbaev.
Sondaı-aq spıker shetelden kelgen týrıster sanynyń da artqanyn atap ótti.
— Jalpy alǵanda, ártúrli týrıstik maqsattarmen elimizge 7,5 mln sheteldik qonaq keldi. Bul san jumys babymen nemese turaqty turý maqsatynda kelgenderdi qospaǵanda anyqtalǵan. Atalǵan kórsetkishtiń ishinde 5 mln adam elimizde bir kúnnen artyq ýaqytyn ótkizgen, sondyqtan olardy biz sheteldik týrıster retinde toptastyramyz, — dedi komıtet tóraǵasy.
Týrıstik nysandardyń tabysy da ósip otyr. Qonaqúıler, demalys bazalary, hostelder jáne basqa da ornalastyrý oryndarynyń jıyntyq kirisi 151 mlrd teńgege jetken. Bul ótken jyldyń alǵashqy jartyjyldyǵymen salystyrǵanda 25%-ǵa joǵary kórsetkish.
— Elimizdegi ornalastyrý oryndarynyń jalpy sany 4 442 nysanǵa jetti (ósim — 255 nysan). Olardyń birmezgilde qabyldaý syıymdylyǵy 232 myńnan astam tósek-oryndy qurap otyr (ósim — 12 myń tósek-oryn), — dedi Nurtas Káripbaev.
Óńirler boıynsha ornalastyrý oryndarynyń eń joǵary ósimi Jetisý oblysynda (+11%), Qaraǵandy oblysynda (+13%), Shyǵys Qazaqstan oblysynda (+11%) jáne Shymkent qalasynda (+10%) baıqaldy.
Sonymen qatar týrızm salasyna quıylǵan ınvestıtsııalar kólemi de aıtarlyqtaı ósken.
— Investıtsııalar kólemi 27%-ǵa artyp, 592 mlrd teńgeni qurady. Eń joǵary ósim Ulytaý oblysynda (+626%), Aqtóbe oblysynda (+241%), Atyraý oblysynda (+214%) jáne Qyzylorda oblysynda (+97%) tirkeldi, — dedi komıtet tóraǵasy.
Buǵan deıin Qazaqstanda da ishki jáne syrtqy týrızm kórsetkishteri jyldan-jylǵa artyp keledi. Elimizdiń ekotýrızm, taý-shańǵy, mádenı-tanymdyq, medıtsınalyq, sporttyq, iskerlik, tipti ǵarysh týrızminde áleýeti zor ekenin jazǵanbyz.