Elimizdiń qaı óńirinde nekege turýǵa májbúrleý órship tur
ASTANA. KAZINFORM — Osy jyldyń basyna beri nekege turýǵa májbúrleý faktileri boıynsha 31 qylmystyq is tirkeldi. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń qylmystyq zańnamasyn ońtaılandyrý máseleleri boıynsha ózgerister men tolyqtyrýlar engizý týraly» zańǵa qol qoıylǵan sátten bastap, Qylmystyq kodekske jańa normalar engizý bóligindegi zańnamanyń novellalary, onyń ishinde stalkıng jáne nekege turýǵa májbúrleý buqaralyq aqparat quraldarynda jáne memlekettik organdardyń resmı aqparattyq resýrstarynda jarııalandy. Sonymen qatar jańa normalardyń iske asyrylýyn taldaý ýákiletti memlekettik jáne jergilikti atqarýshy organdardyń olardy túsindirý jáne olardy praktıkada qoldaný boıynsha qabyldaǵan sharalarynyń jetkiliksizdigin kórsetti, — dedi Úkimet basshysy.
Onyń málimetinshe, 2025 jyly 16 qyrkúıekte zań kúshine engen kúnnen bastap QK-tiń 115-1-baby (stalkıng) boıynsha 15 qylmystyq is jáne QK-tiń 125-1-baby (nekege turýǵa májbúrleý) boıynsha 12 qylmystyq is tirkeldi.
— Osyǵan baılanysty múddeli memlekettik organdar azamattardyń zańnamanyń novellalary týraly habardar bolýyn arttyrý, sondaı-aq jańa qylmystyq-quqyqtyq normalardyń is júzinde qoldanylýynyń aldyn alý jáne qamtamasyz etý jónindegi jumysty jandandyrdy. Bul rette quqyq qorǵaý organdarynda qylmystyq jáne ákimshilik zańnamanyń jańa normalaryn is júzinde qoldaný máseleleri boıynsha jeke qurammen túsindirý jumystary turaqty negizde júrgiziledi, — dedi ol.
Premer-mınıstrdiń aıtýynsha, atalǵan jumys aıasynda tirkeý tártibi týraly erejeler, ótinishter men habarlamalardy qaraý, sondaı-aq qoldanystaǵy zańnamanyń talaptaryna sáıkes sotqa deıingi tergep-tekserý júrgizý tártibi túsindiriledi.
— Qabyldanǵan sharalardyń nátıjesinde osy jyldyń basynan bastap stalkıng faktileri boıynsha 79 qylmystyq is jáne nekege turýǵa májbúrleý faktileri boıynsha 31 qylmystyq is tirkeldi, — dedi Oljas Bektenov.
Úkimet basshysynyń jaýabyna berilgen anyqtamaǵa sáıkes, QK-niń 115-1 baby boıynsha (stalkıng) Shymkent — 23, Astana — 16, Almaty — 8, Pavlodar jáne Qyzylorda — 7, Abaı jáne Túrkistan — 3, Almaty, Batys Qazaqstan, Qaraǵandy, Mańǵystaý, Soltústik Qazaqstan — 2, Shyǵys Qazaqstan jáne Qostanaı oblystary — 1 is, al QK-niń 125-1 baby boıynsha (nekege turýǵa májbúrleý) Shymkent qalasynda — 15, Túrkistan oblysynda — 10, Almaty jáne Qyzylorda oblystaryna — 2, Almaty qalasynda jáne Jambyl oblysynda 1 is tirkelgen.
Aıta keteıik, 9 aqpanda áıelderge zorlyq-zombylyq kórsetýge qarsy respýblıkalyq aqparattyq naýqan bastaldy.
Іs-shara nekege májbúrleý, stalkıng jáne áıelderge qatysty ózge de zorlyq-zombylyqqa tózbeý qaǵıdatyn qalyptastyrýǵa jáne azamattardyń quqyqtyq saýattylyǵyn arttyrýǵa baǵyttalǵan.