Elimizdiń qaı óńirinde etnotýrızm jaqsy damyp keledi
ASTANA. KAZINFORM – Týrızm jáne sport mınıstrligi elimizdiń qaı óńirinde etnotýrızm jaqsy damyp kete jatqanyn atady.
«Etnotýrızmniń damýy elimizde Almaty jáne Túrkistan oblystarynda basqa óńirlerge qaraǵanda joǵary deńgeıde. Bul óńirlerde ulttyq dástúrler men mádenıetke negizdelgen týrlar uıymdastyrylady. Sonymen qatar, qazaq halqynyń turmys-tirshiligi men qolónerin kórsetý maqsatynda etnoaýyldar qurylyp jatyr. Túrkistan oblysynda Uly Jibek joly murasy negizinde etno týrlar usynylady», - dep atap ótti mınıstrlikten agenttiktiń resmı saýalyna oraı.
Degenmen vedomstvo ótken jyly etnotýrızm baǵytynda Qazaqstanǵa qansha týrıst kelgeni týraly naqty málimet joq ekendigin atap ótedi. Óıtkeni, bul baǵytta jeke resmı statıstıka júrgizilmeıdi.
«Biraq, jalpy týrızm salasyndaǵy kórsetkishterge qarap, bul baǵyttyń da qarqyndy damyp jatqanyn baıqaýǵa bolady. Qazaqstanǵa keletin týrısterdiń basym bóligi Reseı, Qytaı, jáne Germanııa sııaqty elderden keledi. Olardyń arasynda etnotýrızmge qyzyǵýshylyq tanytatyndar da az emes. Odan basqa, arab elderinen keletin týrısterdiń etnotýrızmge qyzyǵýshylyǵy joǵary. Qazaqstannyń baı mádenı murasy men ásem tabıǵaty sheteldik týrısterdiń nazaryn aýdarady jáne bul sala aldaǵy ýaqytta odan ári damı beretinine senim mol», - dedi mıınstrlikten.
