Elimizdiń qaı óńirlerinde jańa týrıstik vızıt-ortalyqtary ashylady

ASTANA. KAZINFORM — Premer-mınıstr Oljas Bektenov Senat depýtattarynyń saýalyna bergen jaýabynda elimizdiń qaı óńirlerinde týrıstik vızıt-ortalyqtary salynatynyn aıtty.

— Búginde 15 óńirde 29 vızıt-ortalyq jumys isteıdi. 2026 jyly Abaı jáne Mańǵystaý oblystarynda taǵy eki vızıt-ortalyǵynyń qurylysy josparlanǵan. Jambyl oblysy Jýaly aýdanynyń «Kóksaı» demalys ornynyń aýmaǵynda (jobanyń quny — 150 mln teńge) «Tary» vızıt-ortalyǵynyń qurylysy júrgizilip jatyr, sondaı-aq Pavlodar oblysy Baıanaýyl aýylynda vızıt-ortalyǵynyń qurylysy (jobanyń quny — 950,4 mln teńge, daıyndyq deńgeıi shamamen 70% quraıdy) júzege asyrylady, — dedi Úkimet basshysy.

Sondaı-aq ol Qostanaı, Batys Qazaqstan jáne Soltústik Qazaqstan oblystarynda vızıt-ortalyqtar salý máselesi qaralyp jatqanyn atap ótedi.

— Vızıt-ortalyqtar kólik logıstıkasy (qoǵamdyq kólik marshrýttary men transferlerdi qosa alǵanda), mádenı jáne buqaralyq is-sharalar, sondaı-aq qonaqúıler men jataqhanalardan páter jaldaýǵa deıin ornalastyrý máseleleri boıynsha tegin keńes beredi, — dedi Oljas Bektenov.

Buǵan deıin Іle-Alataýdyń bókterindegi Butaqty shatqalynda Bytakty vızıt-ortalyǵy ashylatynyn jazǵan edik.