Elimizdiń qaı aımaǵy ishimdik pen temekige kóp shyǵyndalady

ASTANA. KAZINFORM – Ulttyq statıstıka bıýrosy jarııalaǵan málimetke súıensek, Shyǵys Qazaqstan men Pavlodar oblysynda, Almaty qalasynda alkogoldi simiretinder kóp.

Jalpy, 2024 jyldyń II toqsanynda respýblıka turǵyndary alkogoldik sýsyndarǵa ortasha eseppen 1642 teńge jumsaǵan kórinedi.

Alkogolge jumsalǵan shyǵyn boıynsha Shyǵys Qazaqstan oblysy kósh bastap tur. Onda bir adamǵa ortasha eseppen 4032 teńgeden keledi.

Odan keıin Almaty qalasy (3372 teńge), Pavlodar (3092 teńge) jáne Soltústik Qazaqstan oblystary (3036 teńge) jaıǵasqan.

Bir qyzyǵy, Almaty men Astana megapolısteri arasyndaǵy alshaqtyq eki esege jýyq. Sáıkesinshe, 3372 jáne 1836 teńgege teń.

Qyzylorda oblysynyń turǵyndary alkogoldi jaqtyra bermeıtin sııaqty. Bul óńirde bir adamǵa shaqqanda 274 teńgeden keledi.

Mańǵystaý (364 teńge) jáne Aqtóbe (365 teńge) aımaqtarynda da kórsetkish tómen.

Túrkistan, Jambyl, Atyraý oblystary men Shymkent qalalarynda bir adamǵa ortasha eseppen 600 teńgeden eseptelip otyr.

Temekini tutynýǵa keletin bolsaq, shyǵyndardyń ortasha kórsetkishi alkogolden edáýir joǵary – 4213 teńge. 

Bul rette temekini jıi tutynatyndar Soltústik Qazaqstan (9566 teńge), Aqmola (9457 teńge) jáne Shyǵys Qazaqstan (8745 teńge) oblystarynda turady eken.

Eń tómen kórsetkish Túrkistan oblysynda (842 teńge), Mańǵystaý oblysynda (1074 teńge) jáne Shymkentte (1516 teńge) tirkelgen.