T-72-den «Smerchke» deıin: Qazaqstan áskeri qandaı tehnıkamen jabdyqtalǵan
ASTANA. KAZINFORM – Qazaqstannyń áskerı bólimderi men bólimsheleri barlyq qajetti tehnıkalarmen jáne qurylǵylarmen qamtamasyz etilgen. QR Qorǵanys mınıstrliginen alǵan resmı jaýap negizinde solardyń birqatary týraly aqparat usynamyz.
T-72 tanki – Qurlyq áskerleri quramalaryndaǵy negizgi jaýyngerlik tehnıka. Ol «Qazaqstan Injınırıng» kásipornynda tolyq jańǵyrtýdan ótken jáne atysty basqarýdyń zamanaýı júıesimen jabdyqtalǵan.
Sonymen qatar jańa baılanys quraldarymen jáne qazirgi zamanǵy qorǵanys júıelerimen qamtylǵan. Joǵary sapasy men qaýipsizdik deńgeıiniń arqasynda bul tanki básekege qabiletti jáne zamanaýı sheteldik analogtardan kem túspeıdi.
Jaıaý ásker jaýyngerlik mashınasy (BMP-2) kez kelgen jaǵdaıda – shóldi jáne taýly jerlerde, sondaı-aq jaýdyń oǵy qarsha boraǵan shaıqas alańynda da qoldanylady. Tipti, sýdy da júzip óte alady.
Jaýyngerlik mashınada 30 mm avtomatty zeńbirek, tankke qarsy basqarylatyn zymyrandar men pýlemet ornatylǵan. Ol qurlyqtaǵy jáne áýedegi nysandardy da atyp túsire alady.
BTR-82A jańa nusqasy jetildirilgen barlaý múmkindikterine ıe. BTR-de 30 mm kalıbrli, jyldam atylatyn avtomatty zeńbirek jáne 7,62 mm kalıbrli juptastyrylǵan pýlemet ornatylǵan.
Bul atysty asqan dáldikpen jáne tıimdilikpen júrgizýge múmkindik beredi. Jaýyngerlik mashınanyń aldyńǵy modelderden aıyrmashylyǵy – sapasy jaqsartylǵan, ártúrli synaqtarǵa tózimdi jáne múmkindikteri keńeıtilgen. Ol sý kedergisin de ońaı eńseredi.
240 mm ózdiginen júretin 2S4 «Tıýlpan» mınometi – myqty bekinisterdiń tasasyndaǵy komandalyq pýnkter men jaý tehnıkasyn joıýǵa arnalǵan eń qýatty mınomet júıeleriniń biri. «Tıýlpan» kádimgi jáne túzetiletin mınalardy atýǵa qabiletti.
Salmaǵy 130 keliden asatyn mınany 18 shaqyrym qashyqtyqqa deıin atady. Osyndaı ár jarylǵysh zat qalyńdyǵy 3 metrlik betondy tesip ótedi. Tehnıkanyń shynjyr tabany oıly-qyrly, tegis-batpaqty jerlermen emin-erkin qozǵalady. Al avtomattandyrylǵan baǵyttaý júıesiniń arqasynda atqan mınasy nysanaǵa dóp tıedi. Osyndaı sıpattamalary eń kúrdeli tapsyrmalardy oryndaýǵa jol ashady.
300 mm 9k58 «Smerch» dúrkindep atatyn reaktıvti júıesi qarsylastyń 90 shaqyrym qashyqtyqtaǵy tehnıkalaryn asqan dáldikpen joıady. 12 baǵyttaýshy qondyrǵysy bar.
Ár oǵynyń jaryqshaqtary 67 gektarǵa deıingi aýmaqqa shashyraıdy. Júıeni urysqa daıyndaý úsh mınýtty alady, al tolyq artıllerııalyq dúrkindep atý 38 sekýndta oryndalady. Jumysyn aıaqtaǵannan keıin, batareıa birden pozıtsııasyn ózgertip, atys aımaǵyn bir mınýttyń ishinde tastap shyǵady.
«Strela-10» zenıttik-zymyran kesheni áýe nysandaryn 5 shaqyrymǵa deıingi qashyqtyqta jáne 3,5 shaqyrymǵa deıingi bıiktikte joıýǵa qabiletti.
Keshen Qurlyq áskerleriniń bólimderi men bólimshelerin ushaqtar, tikushaqtar, qanatty zymyrandar jáne ushqyshsyz ushý apparattary sııaqty tómen ushatyn quraldardyń áýe shabýyldarynan qorǵaýǵa arnalǵan.
S-300PS zenıttik-zymyrandyq júıesi ushaqtardy, strategııalyq qanatty zymyrandardy, jedel-taktıkalyq ballıstıkalyq zymyrandardy ushyrady.
Ol bir mezette 75 shaqyrymǵa deıingi qashyqtyqtaǵy 6 nysanaǵa oq jaýdyrady, ár nysanaǵa 2 zymyrannan baǵyttaı alady.
«Býk-M2E» zenıttik zymyran kesheni – áýe shabýylyna qarsy qorǵanysta eń zamanaýı keshenderdiń biri.
Ol joǵary barlaý, atys jáne manevrlik múmkindikterdi biriktiredi, senimdi ári ońaı jumys isteıdi.
«Barys» brondalǵan dóńgelekti mashınalary qashyqtan basqarylatyn «Suńqar» jáne «Ańsar» jaýyngerlik modýlderimen qarýlanǵan.
Bul – qazaqstandyq «WSE» kompanııasynyń mamandary ázirlegen jańa qarý-jaraq kesheni. «Barys» aýyr kalıbrli soqqylarǵa jáne artıllerııalyq snarıadtardyń synyqtaryna tótep bere alatyn kúsheıtilgen bronǵa ıe. Sondaı-aq, mashına mınalardan qosymsha qorǵanys qabatymen jabdyqtalǵan.
«ShAǴALA-M» ushqyshsyz avıatsııalyq kesheni baǵdar boıynsha avtomatty rejımde barlaý, baqylaý jáne nysanaǵa alýǵa arnalǵan. Ony baılanys aýqymyn arttyrý úshin qaıtalaǵysh retinde paıdalanýǵa bolady. Keshen VOG-25 soqqy oq-dárilerimen jabdyqtalǵan.
«Samǵaý» ekıpajsyz qaıyǵy jer ústi jáne sý asty nysandaryn barlaýǵa jáne zaqymdaýǵa, akvatorııany patrýldeýge jáne kúzetýge baǵyttalǵan.
Modýldik dızaınnyń arqasynda ol ártúrli jaýyngerlik tapsyrmalarǵa tez beıimdeledi. Basqarý júıesin, baǵdarlamalyq-apparattyq keshenin tolyǵymen otandyq mamandar, ıaǵnı Áskerı-strategııalyq zertteýler ortalyǵynyń ǵalymdary ázirlegen.
Aıta keteıik, buǵan deıin Atyraýda áskerı tehnıkanyń qozǵalysyna qatysty mınıstrlik túsinikteme bergenin jazǵanbyz.
