Elimizdiń qalalarynda júk kólikteriniń júrýine tyıym salyna ma – ІІM jaýaby
ASTANA.KAZINFORM – Bul másele jóninde Іshki ister mnıstriniń orynbasary Sanjar Ádilov Parlament Májilisinde ótken brıfıngte málimdedi.
Eske salaıyq, jýyrda elordada kámeletke tolmaǵan velosıpedshini júk kóligi qaǵyp, mert etken edi. Sondaı-aq, Shymkentte de 11 jastaǵy bala júk kóliginiń astyna túsip, qaza tapty.
Sanjar Ádilov, aldymen, osy jaıttarǵa toqtaldy.
– Atalǵan faktilerge baılanysty QR QK 345-baby boıynsha birden qylmystyq ister qozǵaldy. Júrgizýshiler ýaqytsha ustaý ızolıatoryna qamaldy. Sot-avtotehnıkalyq saraptama júrgizý úshin barlyq qajetti shara qabyldanyp jatyr. Jaqynda tergeý aıaqtalady, – dedi ol.
Sonymen birge, jýrnalıster Ádilovke shaharlarda aýyr tehnıkanyń júrýine tyıym salýǵa qatysty suraq qoıdy.
– Júk kólikteriniń qala aýmaǵynda qatynaý tártibi jol júrý erejelerinde qamtylǵan. Búginde elimiz áleýmettik -ekonomıkalyq turǵyda qarqyndy damyp jatyr. Sol sebepti, júk kólikterine qalaǵa kirýge jáne shahar ishinde júrýge tolyqtaı tyıym salý múmkin emes. Óıtkeni, olar qurylys jáne ınfraqurylymdy damytý sektorlarynda úlken jumys atqarady, – dedi Іshki ister mınıstriniń orynbasary.
Onyń sózinshe, jol júrý erejelerin qatań saqtaǵan jaǵdaıda «soqyr aımaq» nemese basqa da jaǵdaılar qylmystyq jaýapkershilikten bosaýǵa negiz bola almaıdy.
Aıta keteıik, buǵan deıin Astanada júk kóligi velosıped mingen balany qaǵyp ketkenin jazǵanbyz.
Sonymen qatar, elimizde keıingi jyldary iri júk kólikteriniń qatysýymen bolatyn jol-kólik oqıǵalary jıileý sebebin Astana qalasy Polıtsııa departamenti Ákimshilik polıtsııa basqarmasynyń bólim bastyǵy, polıtsııa podpolkovnıgi Baýyrjan Toqjumanov Jibek Joly telearnasynyń «Búgin Live» baǵdarlamasynda túsindirdi.
