Elimizdiń geologııalyq aqparaty kelesi jyly tolyqtaı tsıfrlandyrylady

ASTANA. KAZINFORM — Elimizdiń geologııalyq aqparaty kelesi jyly tolyqtaı tsıfrlandyrylady. Bul týraly Úkimet otyrysynda Ónerkásip jáne qurylys vıtse-mınıstri Iran Sharhan aıtty. 

— Búginde Biryńǵaı jer qoınaýyn paıdalaný platformasyn iske qosý nátıjesinde sala ashyq, basqarylatyn jáne qoljetimdi bola túsýde. Atalǵan platformada ótinim berýden bastap, lıtsenzııa alýǵa deıingi tolyq tsıfrlyq tsıkl qarastyrylǵan. Jalpy platformada 22 memlekettik qyzmet kórsetiledi. Elektrondy aýktsıondar men bonýstardy onlaın tóleýge múmkindik beretin «elektrondy ámııan» servısi iske qosylǵan. Osy jyly júıede 94 paıyz, ıaǵnı 5,5 myńnan astam kelisimshart pen lıtsenzııa tsıfrlandyryldy. 730-ǵa jýyq lıtsenzııa berildi. 4 aýktsıon ótkizilip, bonýstan 45 mıllıard teńge bıýdjetke tústi, — dedi Iran Sharhan.

Sonymen qatar, vıtse-mınıstr endi lıtsenzııalar men kelisimsharttar boıynsha esepterdiń 89 paıyzy onlaın qabyldanatynyn aıtty. Sonyń arqasynda mindetterdiń oryndalýy avtomatty túrde baqylanyp, tekserýdiń tıimdiligi artqan.

— Qazir biryńǵaı platforma arqyly 66 myńnan astam geologııalyq esepti onlaın alýǵa múmkindik bar. Sonymen qatar bastapqy geologııalyq aqparatty da tsıfrlandyrý júrgizilip jatyr. Búginde onyń 73 paıyzy elektrondy formatqa aýystyryldy, jyl sońyna deıin 97 paıyzǵa jetedi. Tolyq tsıfrlandyrýdy kelesi jyly aıaqtaý kózdelip otyr, — dedi ol.

Aıta keteıik, Úkimet otyrysynda geologııa jáne jer qoınaýyn paıdalaný salasyn damytý, tsıfrlandyrý sharalary, sonymen qatar halyqty dári-dármekpen qamtamasyz etý máselesi pysyqtalyp jatyr.