Elimizdiń ǵalymdary qurylystaǵy gazobeton bloktarynyń sapasyn zertteýge kiristi
ASTANA. KAZINFORM — L.N. Gýmılev atyndaǵy Eýrazııa ýnıversıtetiniń ǵalymdary avtoklavty gazobeton bloktarynyń jylý tehnıkalyq áleýetin anyqtaýmen aınalysyp jatyr.
Bul qurylys salasyndaǵy normatıvterge ózgeris engizýge septigin tıgizetin sátti qadam ekeni sózsiz. Zertteý PhD doktory Ásel Ermekqyzy Jeksembaevanyń jetekshiligimen «Qazaqstannyń qurylys, jol-qurylys sektorynyń akkredıttelgen qyzmetteriniń tolyq tsıklyn kórsetý boıynsha qurylys-tehnıkalyq ınjınırıngtik ortalyǵyn qurý» megajobasyn júzege asyrý aıasynda iske asyp jatyr.
«Biz eldegi iri zaýyttar ázirlegen avtoklavty gazobeton bloktarynyń jylý tehnıkalyq áleýetin tekserýge kiristik. Ol úshin arnaıy quraldardyń kómegine júginemiz. Bir bloktan 15-ten 21-ge deıin bólik alyp, tekserýge bolady. Qala berdi ár blokty bir emes, birneshe márte tekserip, ortaq arıfmetıkalyq ólshemin shyǵaramyz. Osylaısha, álgi bloktyń jylý tehnıkalyq jaǵdaıyn anyqtaımyz. Negizi, qurylystyń joba-josparlarynda osydan 20 jyl burynǵy málimetter qoldanylyp keledi. Gazoblok tehnologııasy jańa bolǵanymen, standarttar, qoldanyp júrgen aqparattar eski. Biz ázirge Astana, Almaty, Qaraǵandydaǵy 5 iri gazobeton bloktaryn shyǵaratyn zaýyttan ónim ákeldik. Elde kishigirim zaýyttar da jetip artylady. Biraq, olar da básekege qabiletti bolý úshin iri zaýyttarǵa ilesip, jańarady dep oılaımyz. Jalpy, iri zaýyttardan jetken gazobloktardyń sapasy táýir bolǵanymen, óte tamasha dep aıta almaımyz», – deıdi osy baǵytta zertteý júrgizip jatqan ǵylymı toptyń múshesi, tehnıka ǵylymdarynyń doktory Serikbolat Esenqabylov.
Ǵalymdar aldymen materıaldyń qurǵaq kezdegi jylý ótkizgish qasıetin tekseredi. Kóp uzamaı ylǵaldaǵy áleýetin baıqaıdy. Nege deseńiz, gazobeton bloktary únemi qurǵaq qalpyn saqtamaýy múmkin. Qurylys kezinde jaýyn-shashyn bolsa, ónimniń jylý ótkizgish qasıeti mańyzdy. Ǵalymdar muny da tyńǵylyqty zerttep, tekseredi.
Negizi gazobeton ylǵaldy jaqsy sińiretin qasıetke ıe. Qurylys barysynda fızıkalyq zańdylyqtar saqtalsa, yńǵaıly, sapaly ári jeńil ónim ylǵaldy ustap turmaı syrtqa shyǵarady.
Aıta keteıik, megajoba aıasynda Eýrazııa ýnıversıteti Qazaqstan avtoklavty gazobeton óndirýshileriniń qaýymdastyǵymen sharýashylyq kelisimshart jasaǵan. Soǵan sáıkes ýnıversıtet ǵalymdary ózderiniń bazasynda zertteý júrgizedi. Keıin ónimniń sapasy talapqa saı bolmasa, ǵalymdar olqylyqty retteýdiń jolyn usynady. Ǵylym men óndiris arasynda osylaı baılanys ornaıdy. Naryqta belgili bir ónimniń sapasy táýir bolsa, oǵan suranys artatyny belgili.
