Elimizdiń birneshe óńirinde jańa stadıon salynady

ASTANA. KAZINFORM – Almaty qalasynda taǵy jeti qalada jańa stadıon salynady. Bul jańalyqty Týrızm jáne sport mınıstri Erbol Myrzabosynov bólisti.

- Almatyda jańa stadıon qurylysy josparlanǵan. Sondaı-aq jeti qalada jeti stadıon salýǵa arnalǵan jobalyq-smetalyq qujattama ázirlendi. Bıyl kúzde Qyzylordada ÝEFA standartynyń úshinshi sanatyna saı keletin stadıon paıdalanýǵa beriledi, - dedi Erbol Myrzabosynov Parlamenttiń birlesken otyrysynan keıin BAQ ókilderiniń saýalyna jaýap bere turyp.

Onyń aıtýynsha, atalǵan bastama Memleket basshysynyń tapsyrmasy aıasynda qolǵa alyndy.

- Jobalaý jumysy aıaqtalǵannan keıin stadıondardyń quny belgili bolady. Jalpy Memleket basshysy sheteldegi jekemenshik klýbtardyń tájirıbesine súıene otyryp, stadıondy memlekettik qarjy esebinen qarjylandyrmaý jóninde mindet qoıdy, - deıdi vedomstvo basshysy.

Birneshe kún buryn Almatyda 35 myń oryndyq jańa stadıon qaıda salynatyny belgili bolǵan edi. 

Sondaı-aq Qyzylordada UEFA standartyndaǵy jańa stadıon qurylysy aıaqtalýǵa jaqyn.