Elimizdiń birneshe óńirinde ekinshi aýysymdaǵy synyptar onlaın oqıdy

ASTANA. KAZINFORM — Birqatar óńirde aýa raıynyń qolaısyzdyǵyna baılanysty ekinshi aýysymda oqıtyn oqýshylar qashyqtan oqytýǵa aýystyryldy. Bul týraly Kazinform agenttiginiń tilshisi jazdy.

Astanada qatty aıaz ben boran saldarynan barlyq synyp oqýshysynyń ǵana emes, 9-synyp bazasyndaǵy kolledjderdiń 1-2 kýrsynyń stýdentteriniń de sabaqtary toqtatyldy. Olardyń barlyǵy qashyqtan oqytý formatyna kóshirildi.

Qostanaı oblysynyń oqýshylary da onlaın formatqa aýysty. Alaıda, Astanamen salystyrǵanda ekinshi aýysymda úıden tek bastaýysh synyp oqýshylary ǵana oqıdy. Qostanaı qalasynyń bilim bóliminen habarlaǵandaı, ekinshi aýysymdaǵy 0-4 synyp oqýshylary qashyqtan oqytýǵa kóshiriledi. Sondaı-aq oblysta Uzynkól aýdanynyń 6 mektebi ekinshi aýysymǵa kóshedi.

Qaraǵandy oblysynda aıazǵa baılanysty 0-11 synyp oqýshylary úshin sabaqtar toqtatyldy. Óńirdiń barlyq oqýshysy qashyqtan oqytý formatyna aýystyryldy.

Pavlodarda da aýa raıynyń qolaısyzdyǵy baıqalady. Nátıjesinde qalada mektepke deıingi mekemege baratyn balalar, ekinshi aýysymdaǵy 1-4 synyp oqýshylary úılerinde qalady. Qalǵan oqýshylar shtattyq rejımde oqıdy.

Ekibastuzda bilim bóliminiń sheshimimen 0-9 synyp oqýshylary qashyqtyqtan oqytý formatyna kóshirildi. Ekinshi aýysymda oqıtyn joǵary synyp oqýshylary mektepke barady.

Kókshetaýda ekinshi aýysymda oqıtyn 0-9 synyp oqýshylary úılerinde qalady, al 10 jáne 11 synyp oqýshylary úshin sabaq shtattyq rejımde, mektepte ótedi.

Esterińizge sala keteıik, keshe 22 qańtarda aýa raıynyń qolaısyzdyǵyna baılanysty bes óńirdiń mektepterinde sabaq toqtatyldy.

«Qazgıdromettiń» habarlaýynsha, Qazaqstan aýmaǵyna arktıkalyq sýyqtyń túsýi jalǵasýda. Aldaǵy úsh kúnde respýblıka boıynsha temperatýranyń odan ári tómendeýi kútilip otyr.