Elimizdiń birneshe qalasynda aýa sapasy nasharlaıdy

ASTANA. KAZINFORM — «Qazgıdromet» RMK elimizdegi aýa sapasyna qatysty boljamyn jarııalady.

— 27 naýryzda Almaty, Astana, Qaraǵandy, Temirtaý, Petropavl, Pavlodar qalalarynda aýanyń lastanýy úshin qolaısyz meteorologııalyq jaǵdaılar kútiledi, — delingen habarlamada.

Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.

Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.

Aıta keteıik, jýyrda álemdegi eń las qalalardyń reıtıngi túzildi. Shveıtsarııalyq IQAir kompanııasy 2025 jylǵa arnalǵan esepte 143 eldegi 9 446 qalanyń aýa sapasy derekterin zerttedi. Agenttiktiń jahandyq aýa sapasy jónindegi jańartylǵan esebine sáıkes, Úndistan bul tizimniń kóshin bastap tur.

Qazaqstan bul tizimde 55-orynda tur. Ásirese Almaty qalasynyń tútini men las aýasy atap ótilgen.

Álemdegi qalalardyń tek 14%-y ǵana qaýipsiz aýa sapasy standarttaryna saı ekeni anyqtaldy. Bul ótken jylmen salystyrǵanda 3%-ǵa azaıǵan.

Al ekologtar Pavlodardaǵy taǵy bir iri zaýyttan kemshilikter tapty.