Elimizdiń birqatar óńirinde arhıv qoımalary salynady
ASTANA. KAZINFORM – Elimizdiń birqatar óńirinde arhıv qoımalary salynady. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Búgingi kúni arhıvterde ǵylymı-zertteý jumystaryn júrgizý jáne kórmelerge qoıý úshin beriletin qujattardy tsıfrlandyrýǵa basymdyq berilýde. 2024 jyly tsıfrlandyrylǵan qujattardyń úlesi 10,8 paıyzdy (579 011 saqtaý birligi) qurady. Barlyǵy 2 654 404 saqtaý birligi tsıfrlandyryldy. Arhıv salasyn qarjylandyrý ulǵaıtylyp, qujattardy tsıfrlandyrý jáne saqtaý qoryn qurý úshin 1 000-nan astam jańa tehnıka, kompıýter jáne basqa da uıymdastyrý tehnıkasy satyp alyndy, - dedi Úkimet basshysy jaýabynda.
Onyń atap ótýinshe, Memleket basshysynyń óńirlerde arhıv ǵımarattaryn salý qajettiligi týraly tapsyrmasyn oryndaý aıasynda 2025 jyly ortalyq memlekettik arhıviniń 700 myń saqtaý birligine arhıv qoımasynyń qurylysyn salý úshin memlekettik saraptamanyń oń qorytyndysy alyndy. 4 aýdandyq arhıv (Mańǵystaý oblysynyń Jańaózen aýdandyq arhıvi, Jambyl oblysynyń Qordaı jáne Jambyl aýdandyq arhıvteri, Aqtóbe oblysynyń Temir aýdandyq arhıvi) paıdalanýǵa berildi.
- Shyǵys Qazaqstan oblysy, Túrkistan, Qaraǵandy, Almaty, Jambyl oblystarynda jáne basqa da óńirlerde jer ýchaskeleri bólindi. Jambyl oblystyq arhıviniń qurylysyna jobalyq-smetalyq qujattama ázirlenýde, jer ýchaskeleri bólingen 5 oblystyq arhıvte ınjenerlik kommýnıkatsııalardy júrgizýdi júzege asyrýǵa tehnıkalyq sharttar ázirlenýde, - dedi ol.
Oljas Bektenovtiń dereginshe, Qyzylorda oblysynda 3 aýdandyq arhıv «Rýhanııat» mádenı ortalyqtarynyń ǵımarattaryna kóshirildi, 4 aýdandyq arhıvti kóshirý josparlanyp otyr.
- Sondaı-aq «Qurylys jobalarynyń memlekettik banki» derekqorynda óńirlerde arhıv ǵımarattaryn salý kezinde birneshe ret paıdalaný úshin «Daıyn qurylys jobalarynyń tiziliminde» 200 myń jáne 500 myń saqtaý birligine arnalǵan úlgilik jobalyq-smetalyq qujattama qoljetimdi. Aqtóbe jáne Atyraý oblysynyń arhıvterine – 1 mln, Jambyl oblysynyń arhıvine – 1,5 mln saqtaý birligine arnalǵan jobalyq-smetalyq qujattama memlekettik saraptamadan ótkizilýde. Ol qaıta paıdalaný úshin tizilimge engiziletin bolady.
Atalǵan baǵytta jumystar jalǵastyrylýda, - dedi Premer-mınıstr.
Buǵan deıin Ulttyq jáne Ortalyq memlekettik arhıvterge «ulttyq» mártebe beriletindigin jazǵan edik.