Elimizdiń bes oblysynda sýarý sýyn jetkizý tsıfrlyq júıe arqyly rásimdeledi

ASTANA. KAZINFORM – Sý resýrstary jáne ırrıgatsııa mınıstrliginiń «Sý resýrstary aqparattyq-taldaý ortalyǵy» KEAQ sýarý sýyn kanaldar arqyly berý úderisin jeńildetý jáne avtomattandyrý maqsatynda bıllıng júıesin pılottyq rejımde engizip jatyr.

Platformada negizgi protsester tsıfrlandyryldy. Atap aıtqanda, sý tutynýshylar men «Qazsýshar» RMK arasyndaǵy sý berý qyzmetteri boıynsha ótinish berý, kelisimshart jasasý jáne esep aıyrysý.

Ótinim berýden bastap tólem jasaýǵa deıingi barlyq kezeń elektrondy formatta júrgiziledi. Qazirgi ýaqytta ekinshi deńgeıli banktermen birlesip, mobıldi bank qosymshalary arqyly ótinish berý jáne qyzmet aqysyn tóleý múmkindikteri pysyqtalyp jatyr.

- Jumys toby Qyzylorda, Túrkistan, Jambyl, Almaty jáne Jetisý oblystarynda, sonyń ishinde shalǵaı aýdandarda túsindirý jumystaryn júrgizip jatyr. Bıllıng júıesin engizý sharýalar úshin shart jasasý úderisin aıtarlyqtaı jeńildetip qana qoımaı, «Qazsýshar» RMK-ǵa kanaldarǵa túsetin júktemeni tıimdi baqylaýǵa jáne sý resýrstaryn bólýdi josparlaýǵa múmkindik beredi. Sonymen qatar bul júıe sýdyń «qara naryǵymen» kúresýge yqpal etedi. Platforma naqty ýaqyt rejıminde sý tutynýshylardyń qoldanystaǵy sharttarynyń bar-joǵyn kórýge jáne sýarý sýyn zańsyz alý faktilerin anyqtaýǵa múmkindik beredi, – dedi Sý resýrstary jáne ırrıgatsııa mınıstrligi Tsıfrlandyrý departamentiniń dırektory Meıirgúl Qýandyqova.

Túrkistan oblysyndaǵy aýdandarda jańa bıllıng aqparattyq júıesi pılottyq rejımde engizilip jatqanyn jazǵan edik.