Elimizdiń basym bóliginde aýa raıy turaqsyz bolady - Qazgıdromet

ASTANA. KAZINFORM – Elimizdiń 7 paıyz aýmaǵyn ǵana qar jamylyp jatyr. Bul týraly «Qazgıdromet» RMK baspasóz hatshysy Alına Ysmaǵulova aıtty.

«Qazaqstan aýmaǵynyń qarmen jabylǵan aýdany 7 paıyzdy quraıdy. Sınoptıkalyq boljamǵa sáıkes, 13-19 sáýirde Qazaqstan aýmaǵynyń basym bóliginde aýa raıynyń turaqsyz sıpaty saqtalady. Jaýyn-shashyn jańbyr túrinde bolady dep boljanýda. Qazaqstannyń soltústik-batysynda, soltústiginde, shyǵysynda, ortalyǵynda - 14-15 sáýirde Ulytaý, Aqtóbe, Soltústik Qazaqstan oblystarynda, 14-16 sáýirde Qaraǵandy oblysynda, 14-17 sáýirde Qostanaı oblysynda, 15-16 sáýirde Aqmola, Pavlodar oblystarynda, 16-19 sáýir Shyǵys Qazaqstan oblysynda túnde jańbyr qarǵa ulasýy múmkin. Qatty jańbyr 13-14 jáne 16 sáýirde Túrkistan oblysynda, 14-16 sáýirde Almaty, Jambyl oblystarynda, 16 sáýirde Jetisý oblysynda bolady dep boljanýda», - dedi ol Ortalyq kommýnıkatsııalar qyzmetindegi brıfıngide.

Onyń aıtýynsha, jaýyn-shashyn elimizdiń batysynda, soltústik-batysynda, ońtústiginde 17 sáýirden bastap, respýblıkanyń soltústiginde 19 sáýirden bastap toqtaıdy. Sonymen qatar kelesi aptadan bastap elimizdiń barlyq aýmaǵynda kún jylyna bastaıdy. 

Buǵan deıin Jetisý oblysynda ózenderdiń sýy kóterilip, Almaty oblysynda qar kóshkini júrýi múmkin ekenin jazǵan edik.