Elimizdiń basym bóligin tuman basady — Qazgıdromet

ASTANA. KAZINFORM — «Qazgıdromet» Qazaqstan aımaqtarynda 25 qarashada bolatyn qaýipti meteorologııalyq qubylystarǵa boljaý konsýltatsııasyn jarııalady.

Sınoptıkterdiń málimetinshe, Qazaqstan Respýblıkasy aýmaǵynyń basym bóligi aýqymdy antıtsıklonnyń yqpalynda bolǵandyqtan, jaýyn-shashynsyz aýa raıy saqtalady.

— Respýblıka boıynsha, jeldiń kúsheıýi, túngi jáne tańǵy ýaqyttarda tuman kútiledi, — delingen habarlamada.

Astana qalasynda kún jaýyn-shashynsyz, kóshpeli bultty. Jeldiń ekpini sekýndyna 2-7 metrge barady. Aýa temperatýrasy kúndiz -4°C deıin aıaz bolady. 

Almaty qalasynda kóshpeli bultty, jaýyn-shashynsyz kún raıy kútiledi. Qalada aýa temperatýrasy kúndiz +9°C deıin jylynady. Taýly aýdandarda tuman kútiledi. 

Shymkent qalasynda azdaǵan jaýyn-shashyn (negizinen jańbyr) túsedi. Aýa temperatýrasy kúndiz 14°C deıin jylynady. Qatty jel soǵady dep boljandy. Keı jerlerde jeldiń ekpini 23 m/s deıin jetýi múmkin.

Budan bólek, alty oblysta, atap aıtqanda Jambyl, Atyraý, Ulytaý, Qyzylorda, Qaraǵandy, Abaı oblystarynda qatty jel soǵýy yqtımal.

Eske salsaq, buǵan deıin búgin 8 qalada aýa sapasy nasharlaıtyny habarlandy.

Sonymen qatar, Abaı oblysynda boranǵa baılanysty kólik qozǵalysy shektelgeni anyqtaldy.