Elimizdiń barlyq sý obektisinde sý qorǵaý aımaqtary men beldeýlerin belgileý josparlanyp otyr
ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov Parlament Májilisiniń depýtattarymen birge jańa Sý kodeksin iske asyrý máselelerin talqylady. Ásirese Sý resýrstarynyń aqparattyq-taldaý ortalyǵynyń jumysyna erekshe nazar aýdaryldy.
Búginde ortalyq mamandary sý resýrstarynyń Ulttyq aqparattyq júıesin ázirlep jatyr. Mınıstr men depýtattar jobanyń júzege asý barysymen tanysty. Qazirgi ýaqytta Qazaqstan boıynsha 5000-nan astam sý obektisi tsıfrlandyrylyp, júıege engizilgen. «Qazsýshar» mamandary kún saıyn júıege ózekti derekterdi engizip otyrady. Bolashaqta bul protsesti tolyq avtomattandyrý josparlanyp otyr.
Aıta keteıik, sý resýrstarynyń Ulttyq aqparattyq júıesin ázirleýge memlekettik bıýdjetten qarajat bólinbeıdi. Joba Eýrazııalyq damý bankiniń granty esebinen júzege asyrylyp jatyr.
Mınıstrlik BUU Damý baǵdarlamasymen birlesip, nemistiń TalsimNG júıesin engizip jatyr. Bul júıe sý qoımalaryna túsetin sýdyń qysqa jáne uzaq merzimdi boljamdaryn usynady. Qazirgi tańda Esil jáne Nura ózenderiniń basseınderi tolyqtaı modeldengen. Jyl sońyna deıin eldegi barlyq sý resýrsyn tsıfrlyq modeldeý josparda bar.
Sondaı-aq kezdesýde Balqash kólin saqtaý boıynsha master-jospar qurý talqylandy. Byltyr Sý resýrstary jáne ırrıgatsııa mınıstrligi Frantsııanyń damý agenttigimen kelisimge qol qoıdy, qujatqa sáıkes frantsýz tarapy kól basseınin keń kólemde zertteıdi. Nátıjesinde 2040 jylǵa deıin uzaq merzimdi master-jospar ázirlenedi. Búgingi tańda qajetti derekterdi jınaý jáne frantsýz sarapshylarymen aqparat almasý jalǵasyp jatyr.
Otyrysta kóterilgen taǵy bir taqyryp elimizdiń sý obektilerinde sý qorǵaý aımaqtary men beldeýlerin ornatý boldy. Jumysty úsh kezeńde júrgizip, 2027 jylǵa qaraı aıaqtaý josparda bar. Eń aldymen sý qorǵaý aımaqtary men beldeýleri iri sý obektilerinde, keıin orta jáne shaǵyn obektilerde ornatylady.
Májilis depýtattary mınıstrge jáne aqparattyq-taldaý ortalyǵynyń mamandaryna atqarylyp jatqan jumystar týraly suraqtar qoıyp, óz usynystaryn bildirdi. Depýtattar kadr daıarlaý, qurǵaqshylyqty boljaý, aýyl sharýashylyǵynda sýdy esepke alý, sýdy qaıta paıdalaný júıesin engizý, sý mańynda paıdaly qazbalardy óndirý sekildi ózekti máselelerge nazar aýdardy.
Jańa Sý kodeksi men oǵan qatysty zań jobalaryn ázirleý barysynda belsendilik tanytqany úshin Májilis depýtattaryna alǵys bildiremin. Bizdiń birlesken jumysymyz munymen aıaqtalmaıdy. Qujat 10 maýsymnan bastap kúshine enedi. Sondyqtan jańa sý zańnamasynda qoıylǵan mindetterdi tıimdi iske asyrýdy qamtamasyz etýimiz kerek, – dedi Sý resýrstary jáne ırrıgatsııa mınıstri Nurjan Nurjigitov.
Aıta ketelik sý qoımalaryna sýdyń kelý kólemin boljaıtyn aqparattyq júıe engizilip jatyr.