Elimizdiń barlyq sý qoımalary sý tasqyny kezeńine daıyndalýda
ASTANA. KAZINFORM – Elimizdiń barlyq sý qoımalary tasqyn sýyn qabyldap, qaýipsiz ótkizýge daıyndalýda. Bul týraly Sý resýrstary jáne ırrıgatsııa mınıstrligi habarlady.
− Sý salasynyń barlyq mamandary kele jatqan kóktemgi sý tasqyny kezeńine belsendi daıyndyqty bastady. Dálirek aıtqanda, elimiz boıynsha 1502 gıdrotehnıkalyq qurylysqa zertteý júrgizilip, barlyq anyqtalǵan kemshilikter joıylǵan. Arnaıy jol kartasy ázirlenip, 10 oblysta 51 ózen men 1 kól anyqtalyp, 814 shaqyrym ýchaske tazartylatyn boldy, - dedi mınıstrliktiń resmı ókili Móldir Ábdýálıeva Ortalyq kommýnıkatsııalar qyzmetinde ótken brıfıngte.
Ótken jyly sý qoımalary men basqa da gıdrotehnıkalyq nysandardy jańǵyrtý jáne jóndeý boıynsha aýqymdy jumys bastaldy.
− Aqtóbe sý qoımasyna 36 jylda alǵash ret rekonstrýktsııa jasaldy. Búginde qoımanyń syıymdylyǵy 245 mln tekshe metrge jetti. Al Batys Qazaqstan oblysynda sońǵy 58 jylda birinshi ret Kırov sý qoımasy jóndeldi. Budan bólek, sýarý kanaldary qalpyna keltirildi, nátıjesinde sharýalarǵa, fermerlerge arnalǵan sýarmaly sýdyń sapasy jaqsarady. Atyraýda 41 jylda alǵash ret 74 shaqyrym bolatyn «Aqsaı» kanaly jóndeldi, - dep tolyqtyrdy spıker.
Astana sý qoımasyn rekonstrýktsııalaý úshin jobalaý-smetalyq qujattama ázirlenip jatyr.
Shyǵys Qazaqstan oblysynda Qandysý ózenindegi sý qoımasyn qaıta jańǵyrtýǵa daıyndyq júrýde.
− Elimizdiń 16 óńirinde jalpy uzyndyǵy 584 shaqyrym bolatyn 400-ge jýyq bóget jóndeldi. 6 oblystyń 84 eldi mekeninde qorǵanys bógetteri men gıdrotehnıkalyq qurylystardy salý, rekonstrýktsııalaý jáne qalpyna keltirý jumystary júrgizilýde. Bul Aqmola, Aqtóbe, Batys Qazaqstan, Pavlodar, Soltústik Qazaqstan jáne Qostanaı oblystary. Bul jumystar 359 myń adamnyń qaýipsizdigin qamtamasyz etýge múmkindik beredi, - dedi M. Ábdýálıeva.
Aıta keteıik, Reseı de Qazaqstanmen shekaralas aımaqtarda sý tasqynyna qarsy sharalar júrgizýde.