Elimizdiń barlyq baǵytta áleýeti nyǵaıyp keledi – Memleket basshysy
ASTANA. KAZINFORM – Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda sóılegen sózinde jastardyń jetistikterine toqtalyp, qoǵam qundylyqtary týraly aıtty.
– Birlik, jaýapkershilik, tózimdilik, ózara qoldaý jáne senim rýhy – bizdiń qoǵamǵa tán asyl qundylyqtar. Bul qaǵıdattardyń el erteńi úshin máni zor. Muny jastarymyzdyń tereń túsinetini qýantady. Biz daryndy ul-qyzdarymyzdyń sportta, ónerde, ǵylymda, bıznes pen tehnologııa salasynda baǵyndyrǵan belesterine shyn júrekten qýanamyz. Olardyń jetistikterin tutas el bolyp atap ótemiz, memlekettik nagradalarmen marapattaımyz. Tól mádenıetimizdiń, tehnologııa salasyndaǵy tabystarymyzdyń, yrysty yntymaǵymyzdyń jarqyn mysaldary Qazaqstandy bolashaqqa qol sozǵan progressıvti ári órkenıetti el retinde tanytady. Ózderińizge málim, jumys keńesteri men kezdesýlerde, halyqqa arnaǵan Joldaýymda barlyq atqarýshy organnyń jumysyndaǵy kemshin tustardy ashyq aıtyp, taldaý jasaımyn. Bul – durys. Áıtse de kózge aıqyn kórinip turǵan jetistikterdi de atap ótkenimiz jón. Elimizdiń barlyq baǵytta áleýeti nyǵaıyp keledi. Endigi mindet – damý qarqynyn saqtap, jańa maqsatqa jetý úshin alǵa umtylý. Bıyl táýelsiz el bolǵanymyzǵa 35 jyl tolady. Osy ýaqyt aralyǵynda jaǵymdy jáne jaǵymsyz kóptegen oqıǵaǵa kýá boldyq. Mereıimizdi ósirgen, jigerimizdi jasytqan sátterdi de bastan ótkerdik. Bastysy, biz shyńdalyp, álem elderimen terezesi teń memleket retinde ómir súrýdi úırendik. Alaıda dúnıe bir orynda turmaıdy. Álem kóz ilespes jyldamdyqpen ózgerdi, adamzattyń dúnıetanymy da jańardy. Demek, bizge, ıaǵnı Qazaqstan azamattaryna da ózgerý qajet. Halqymyzdyń bolashaǵy osy úderistiń qanshalyqty tabysty júzege asatynyna tikeleı baılanysty, - dedi Prezıdent.
Eske sala keteıik, buǵan deıin Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda sóz sóılegenin jazǵanbyz.
