Oljas Bektenov Memleket basshysyn eldegi sý tasqyny jaǵdaıynan únemi habardar etip otyr

ASTANA. KAZINFORM - Premer-Mınıstr, Sý tasqynyna qarsy is-sharalardy úılestirý jáne sý tasqyny zardaptaryn joıý jónindegi respýblıkalyq shtab jetekshisi Oljas Bektenov Memleket basshysy Qasym-Jomart Toqaevty eldegi sý tasqyny jaǵdaıy men ahýaldy turaqtandyrý boıynsha qabyldanyp jatqan sharalar týraly únemi habardar etip otyr.

QR Úkimeti baspasóz qyzmetiniń habarlaýynsha, Prezıdent tapsyrmasy boıynsha, Oljas Bektenov búgin Aqtóbe jáne Shyǵys Qazaqstan oblystaryna bardy. Sondaı-aq óńirlik shtab jetekshileriniń qatysýymen Sý tasqynyna qarsy is-sharalardy úılestirý jáne sý tasqyny zardaptaryn joıý jónindegi respýblıkalyq shtab otyrysyn ótkizdi.

Premer-Mınıstrdiń tapsyrmasy boıynsha vıtse-premer, Sý tasqynyna qarsy is-sharalardy úılestirý jáne sý tasqyny zardaptaryn joıý jónindegi respýblıkalyq shtab jetekshisiniń orynbasary Qanat Bozymbaev Atyraý oblysyna, tótenshe jaǵdaılar mınıstri Shyńǵys Árinov Qostanaı oblysyna jiberildi. Mindet - sý tasqyny jaǵdaıyn turaqtandyrý boıynsha jergilikti jumystardy úılestirý.