Elimizdiń aýmaqtyq tutastyǵy men memlekettik qurylymy myzǵymas sıpatqa ıe – Toqaev
ASTANA. KAZINFORM – Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda jurt aldyndaǵy bedelin kóterý úshin ult múddesine shekeden qarap, shekten shyǵatyndar bar ekenin aıtty.
– «Saıası býllıngpen» sheteldik azamattardyń aınalysatyny óz aldyna. Biraq osy qıturqy áreketke óz azamattarymyzdyń barýyn, onyń ústine sebepsiz soqtyǵýyn túsiný óte qıyn. Keıbireýler óz baǵasyn asyryp, jurt aldyndaǵy bedelin kóterý úshin ult múddesine shekeden qarap, shekten shyǵady. Tym bolmasa jańa Konstıtýtsııanyń ıdeologııalyq jáne saıası mánine, usynylǵan normalardyń qandaı ról atqaratynyna bir sát úńilip kórgen jón. Biz arnaýly rejımdi tek qarajat, ıaǵnı kapıtal tartý úshin engizip otyrmyz. Mundaı artyqshylyq qarjylyq basqarý, salyq jeńildikteri jáne sot rásimderine qajetti jumystardy qamtamasyz etý úshin beriledi. Máselen, osyndaı rejım Alataý qalasyna qatysty qoldanylmaq. Konstıtýtsııada arnaýly quqyq rejımin bekitý arqyly biz ınvestorlarǵa qolaıly jaǵdaı jasaımyz. Jer júzine Qazaqstandy turaqty, ashyq, kedergisiz jáne ishki naryqtaǵy ahýaly aıqyn el retinde kórsetemiz. Mundaı aýmaqtar Qazaqstannyń birtutas konstıtýtsııalyq, quqyqtyq keńistiginiń ajyramas bóligi sanalady jáne solaı bolyp qala beredi. Konstıtýtsııalyq júıeniń asa mańyzdy bóligi retinde elimizdiń aýmaqtyq tutastyǵy men memlekettik qurylymy myzǵymas sıpatqa ıe, - dedi Prezıdent.
Ata zań jobasynda ulttyq valıýtanyń mártebesi aıqyndaldy. Bul – mán-mańyzy zor norma. Tól valıýtanyń Eltańba, Tý jáne Ánuranmen qatar turýy beker emes.
– Jańa Ata zańymyzda Táýelsizdikti, egemendikti jáne aýmaqtyq tutastyqty qorǵaý basty qaǵıdattar retinde kórsetilgenine taǵy da toqtalǵym keledi. Bul erejelerdi qaıta qaraýǵa, basqasha tápsirleýge bolmaıdy. ıAǵnı ol múldem ózgermeıdi. Osyndaı negizgi erejelermen qatar, Ata zań jobasynda ulttyq valıýtanyń mártebesi aıqyndaldy. Bul – mán-mańyzy zor norma. Tól valıýtanyń Eltańba, Tý jáne Ánuranmen qatar turýy beker emes. Bul jańashyldyq egemendikti, sonyń ishinde qarjylyq derbestikti quqyqtyq turǵydan qorǵaýdy kózdeıdi. Myna nárseni atap ótkim keledi: Qazaqstan halqy bıliktiń bastaýy jáne egemendiktiń ıesi sanalady. Osy ereje Konstıtýtsııa jobasynda jańa norma retinde naqty bekitildi. Bul – jańa Ata zań memlekettigimizdiń tuǵyryn nyǵaıta túsedi degen sóz. Munyń, ásirese, geosaıası ahýal qubylyp, turaqsyzdyq ornap, ulttyq qaýipsizdikke syn-qaterler tónýi múmkin kezeńde mańyzy zor. Ata zańnyń mátini ǵana emes, máni men maǵynasy ózgerdi. Onda san ǵasyrlyq memlekettilik dástúrimiz, maqsat-murattarymyz ben myzǵymas qundylyqtarymyz naqty kórsetildi, - dedi Memleket basshysy.
Jańa Konstıtýtsııa jobasy adam quqyqtary men bostandyqtaryn qorǵaýdy eń joǵary deńgeıge kóteredi.
