Elimizdiń aýyl sharýashylyǵy ónimderi 15-ten asa elge eksporttalady

ASTANA. KAZINFORM — Otandyq aýyl sharýashylyǵy taýaryn óndirýshiler álemdik naryqta mal sharýashylyǵy ónimderi boıynsha pozıtsııalaryn belsendi túrde nyǵaıtyp keledi, dep habarlaıdy AShM baspasóz qyzmeti.

Búginde elimizdiń aýyl sharýashylyǵy ónimderi EAEO, EO, TMD memleketteri, Parsy shyǵanaǵy elderi, sondaı-aq Qytaı, Koreıa, Japonııa, Ázerbaıjan, Ózbekstan, Mońǵolııa syndy 15-ten astam elge tasymaldanady.

Qytaımen soıýǵa arnalǵan ІQM, teri, qus eti men qosalqy ónimderin eksporttaýǵa veterınarııalyq hattamalarǵa qol qoıyldy. Qymyz, qurǵaq bıe súti, termııalyq óńdelgen ónim, salqyndatylǵan sıyr eti, qoı eti jáne shoshqa etin jetkizýdi kelisý jumystary júrgizilip jatyr. Sondaı-aq termııalyq óńdelgen qoı jáne serke eti, muzdatylǵan, salqyndatylǵan jáne termııalyq óńdelgen shoshqa etin eksporttaýǵa arnalǵan hattamalarǵa da qol qoıyldy.

Qazaqstan sondaı-aq EO-ǵa bal eksporttaýshy elder tizimine engizilgen. Qosymsha qymyz ben balyq sharýashylyǵy ónimderin eksporttaý baǵyttary pysyqtalyp jatyr.

Alǵash ret 9 kásiporyn Qytaıdyń azyq-túlikke jatpaıtyn tizilimine engizilip, bul jańa saýda múmkindikterin ashty.

Irakpen soıýǵa arnalǵan ІQM men UQM eksporttaýǵa baılanysty eki veterınarııalyq sertıfıkat nysany kelisildi, al Grýzııamen tórt sertıfıkat nysany bekitildi, bul el naryǵyn ashýǵa múmkindik berdi. Ázerbaıjanmen balyq pen ara sharýashylyǵy ónimderin eksporttaýǵa sertıfıkattar kelisildi, Iranmen tuıaqty janýarlardyń terisin eksporttaý boıynsha qujattar kelisildi. BAÁ-men sporttyq jylqylardy eksporttaýǵa daıyndyq júrip jatyr, al Ulybrıtanııaǵa ІQM embrıondaryna arnalǵan sertıfıkat joldandy.

Japonııamen (tiri jylqylar, bıe jáne túıe súti), Ońtústik Koreıamen (balmuzdaq), Malaızııamen (sút jáne et ónimderi), sondaı-aq Brýneı, Vetnam, Taıland, Sıngapýr, Qatar, BAÁ jáne Bosnııa jáne Gertsegovına elderimen jańa eksporttyq baǵyttardy ashý boıynsha jumystar jalǵasyp jatyr.

— Jalpy, sheteldik eksporttaýshylar tizilimine 3702 kásiporyn engizilgen. Onyń ishinde: EAEO — 3339, QHR — 57, EO — 63, Ózbekstan — 101, BAÁ — 13, Iran — 13, Japonııa — 47, Túrkııa — 16, Koreıa — 5, Saýd Arabııasy — 43, Ázerbaıjan — 9. Belarýs, Reseı, Qytaı, Armenııa jáne Túrkııany qosa alǵanda birqatar elder Qazaqstannyń jekelegen óńirlerinde aýsyl men qus tumaýynyń anyqtalýyna baılanysty buryn engizilgen ýaqytsha shekteýlerdi alyp tastady, — delingen mınıstrlik habarlamasynda.

Buǵan deıin Prezıdent aýyl sharýashylyǵy ónimderin áýe kóligimen tasymaldaý isin retteýdi tapsyrǵanyn jazǵanbyz.