Qazaqstan áýejaılarynda shekaralyq baqylaýdan ótý tártibi bekitildi

ASTANA. KAZINFORM – Kólik mınıstriniń 2025 jylǵy 1 qazandaǵy buıryǵymen áýejaılarda jolaýshylarǵa qyzmet kórsetýdi uıymdastyrý qaǵıdalaryna ózgeris engizildi.

Atap aıtqanda, ushar aldynda jáne qonǵan kezde shekaralyq baqylaýdan ótý tártibi naqtylandy.

Sonymen kelesi talaptar belgilendi:

- áýejaıdyń shekara qyzmetimen kelisilgen, jolaýshylardyń ushý/kelý rásiminiń ýaqytyna qatysty standarttyń bolýy;

- baqylaýdan ótýge deıin jolaýshylarǵa rásimnen ótý talaptary týraly aqparattyń usynylýy;

- pasporttyq baqylaý kezinde jolaýshylarǵa qyzmet kórsetý jyldamdyǵynyń shekara qyzmetimen kelisilip, onyń oryndalý barysyn baqylaý;

- jylyna bir mıllıonnan astam jolaýshy aǵyny bar áýejaılarda avtomattandyrylǵan pasporttyq baqylaý júıesiniń bolýy. Atalǵan júıemen jabdyqtaý senimgerlik basqarýǵa nemese jekemenshikke berilgen áýejaı operatoryna júkteledi;

- jolaýshylar aǵynyna qaraı shekaralyq baqylaý qyzmeti personalynyń táýliktik jumys kestesiniń áýejaımen kelisilip, ótkizý qabiletin jedel arttyrý múmkindigin qamtamasyz etý;

- personaldyń syrtqy kelbetine qoıylatyn qyzmet talaptary standartynyń jáne onyń oryndalýyn baqylaýdyń bolýy.

Sondaı-aq qujatta shekaralyq baqylaýdan ótý kezinde jolaýshy úshin rásimniń qarapaıym ári jyldam bolýy jáne shekaralyq baqylaý qyzmeti personalynyń sypaıy bolýy tıis ekeni kórsetilgen.

Buıryq 2025 jylǵy 19 qazannan bastap kúshine enedi.

Bıyl jazda elimizdiń áýejaılarynda tekserý barysynda tárkilengen, tasymaldaýǵa tyıym salynǵan zattardyń endigi ýaqytta saqtalmaıtyndyǵy týraly habarlaǵan edik.