Elimizdiń áýejaılarynda qyzmet kórsetý kólemi 25 paıyzǵa artty
11 aıda otandyq áýe kompanııalary 12 mln 300 myń jolaýshy tasymaldady. Bul týraly Úkimet otyrysynda Kólik mınıstri Marat Qarabaev aıtty, dep habarlaıdy Kazinform.
«Osy jyldyń 11 aıynda otandyq áýe kompanııalary 12 mln 300 myń jolaýshy tasymaldady. Bul ótken jylmen salystyrǵanda 23 paıyzǵa joǵary. Jyl qorytyndysy boıynsha atalǵan kórsetkishti 13 mln-ǵa deıin jetkizý josparlanyp otyr. Áýejaılarda qyzmet kórsetý kólemi 25 paıyzǵa artyp, 24 mln jolaýshyny qurady. Aıtarlyqtaı ósim Almaty jáne Astana áýejaılarynda baıqalady. Olarda bıyl tıisinshe rekordtyq 9 mln jáne 7 mln jolaýshyǵa qyzmet kórsetildi. Sondaı-aq, áýejaılarda óńdelgen júk kólemi de ulǵaıyp, jyl basynan beri kórsetkish 130 myń tonnany qurady, ıaǵnı, ósim — 16 paıyz», — dedi Marat Qarabaev.
Onyń atap ótýinshe, áýe tasymalyna ósip kele jatqan suranysty qanaǵattandyrý úshin áýejaı ınfraqurylymyn jańǵyrtý jumystary jalǵasyp jatyr. Aldaǵy jyldyń naýryz aıynda Shymkent, mamyr aıynda Qyzylorda jáne maýsym aıynda Almaty qalalaryndaǵy jańa áýejaı jolaýshylar termınaldarynyń qurylysy aıaqtalady. Atalǵan jumystarǵa 150 mlrd teńgeden astam jeke ınvestıtsııa tartyldy.
«Jobalardy júzege asyrý nátıjesinde Almaty qalasy áýejaıynyń ótkizý qabileti — 5 ese, Qyzylorda áýejaıy — 6 ese jáne Shymkent 7 ese ulǵaıatyn bolady. Kelesi jyly Birikken Arab Ámirlikteriniń ınvestory astanalyq áýejaıdyń ushý-qoný jolaǵyn óz qarajaty esebinen rekonstrýktsııalaýǵa kirisedi. Bul jańa basqarýshy kompanııanyń aldyna qoıylǵan birinshi kezektegi mindetterdiń birisanalady. Sondaı-aq, 2024 jyly Memleket basshysynyń tapsyrmasyna sáıkes Pavlodar qalasy áýejaıynyń ushý-qoný jolaǵyn jáne Balqash qalasy áýejaıynyń perrony men rýldeý jolaǵyn rekonstrýktsııalaý boıynsha jumystar bastalady», — dedi mınıstr.
