Elimizdiń astyǵy qaı elderge eksporttalady

ASTANA. KAZINFORM —   Jańa astyq eksporty 7,6 mln tonnaǵa jetti. Bul týraly AShM baspasóz qyzmeti habarlady. 

«QTJ» UK» AQ málimetinshe, 2024 jylǵy qyrkúıekten 2025 jylǵy sáýirge deıingi aralyqta jańa astyq ónimi eksporty 7,6 mln tonna boldy. Bul ótken jylǵy osy kezeńmen salystyrǵanda 58%-ǵa artyq (4,8 mln tonna).

Eksport kóleminiń artýy qazaqstandyq astyqqa syrtqy naryqtaǵy joǵary suranysty, sondaı-aq jetkizý geografııasynyń keńeıip, logıstıkalyq baǵyttardyń tıimdi jetildirilip jatqanyn kórsetedi.

Eksporttyń negizgi baǵyttary jáne ósim qarqyny: Ózbekstan — 2,7 mln tonna (+29,7%, 2023 jylǵy 2 mln tonnamen salystyrǵanda); Tájikstan — 1,1 mln tonna (+51%, 726 myń tonnamen salystyrǵanda); Aýǵanstan — 270 myń tonna (+34%, 202 myń tonnamen salystyrǵanda); Qyrǵyzstan — 181 myń tonna (eki ese artty); Iran — 889 myń tonna (2023 jylǵy 54 myń tonnamen salystyrǵanda 16,4 ese ósti); Ázerbaıjan — 569 myń tonna (5 myń tonnadan 113,8 ese ósti).

Aýyl sharýashylyǵy mınıstrligi agroónerkásiptik keshenniń eksporttyq áleýetin damytý jáne qoldaý jumystaryn jalǵastyryp jatyr.

Eske sala keteıik agroónerkásip ónimderiniń eksporty 60-tan astam elge shyǵyp jatyr.