Elimizdiń árbir azamaty taza Qazaqstanda jaıly ómir súrýi kerek – Prezıdent
ASTANA. KAZINFORM – Elimizdiń árbir azamaty búgin de, erteń de «Taza Qazaqstanda» jaıly ómir súrýi kerek. Bul týraly Memleket basshysy Qasym-Jomart Toqaev «Taza Qazaqstan» ekologııalyq aktsııasynda aıtty.
Prezıdenttiń aıtýynsha, «Taza Qazaqstan» – jaı ǵana uran emes, shyn máninde elimizdiń tazalyǵy, órkenıetti bolashaqqa aparatyn dańǵyl jol degen sóz.
– Túptep kelgende bul jumystyń bári de óskeleń urpaqtyń qamy úshin jasalyp jatyr. Elimizdiń árbir azamaty búgin de, erteń de taza Qazaqstanda jaıly ómir súrýi kerek. Alaıda osyndaı keremet ómir ózdiginen aspannan túspeıdi. Bul da – eń aldymen árbir azamattyń sanaly kózqarasy, bolmysy. Solaı bolsa ǵana, halqymyz ben jalpy elimizdiń halyqaralyq bedeli joǵary bolady, ınvestıtsııalyq tartymdylyǵy kúsheıe beredi, – dedi Qasym-Jomart Toqaev Prezıdent saıabaǵynda ótken ekologııalyq naýqanda.
Memleket basshysy tazalyq uǵymyna keń aýqymda qaraý qajettigin, oıy men nıeti taza adamnyń árbir áreketi túzý bolatynyn atap ótti.
– Tazalyqty eń aldymen ózimizden bastaý mańyzdy. Men Qazaqstan jastaryn, ıaǵnı sizderdi dál sondaı júregi taza, adal azamattar dep esepteımin. Bul sózdiń maǵynasyn keń turǵydan alyp qarasaq, tazalyq lastyqtyń aldynda eshqashan utylmaıdy, tazalyq bárin jeńedi. Bul da – ómirdiń ózi rastaǵan máńgi aqıqat dúnıe, – dedi Q. Toqaev.
Aıta keteıik, Memleket basshysy Qasym-Jomart Toqaev «Taza Qazaqstan» ekologııalyq aktsııasyna qatysty jáne jas ekobelsendilermen birge Prezıdent saıabaǵy aýmaǵynda aǵash ekti.
Eske sala ketsek, 19 qyrkúıekte Dúnıejúzilik tazalyq kúni (World Cleanup Day) atalyp ótedi. Bul kúni elimizdiń barlyq óńirinde «Taza Qazaqstan» jobasy aıasynda aýqymdy ekologııalyq aktsııalar ótedi.
