Elimizdiń ár túkpirinde jalpy quny 1,5 trln teńge bolatyn 190 óndiris orny iske qosyldy – Toqaev
ASTANA. KAZINFORM – Táýelsizdik saraıynda Memleket basshysy Qasym-Jomart Toqaevtyń qatysýymen barlyq deńgeıdegi máslıhat depýtattarynyń ІІІ respýblıkalyq forýmy ótip jatyr. Bul týraly Aqorda habarlady.
— Ondaǵan jyl boıy ekonomıkamyzda tapshylyq, birjaqtylyq kóp bolǵanyn bilesizder. Bul elimizdiń odan ári damýyna úlken kedergi boldy, áli kúnge deıin osyndaı keleńsiz úrdis bar. Óndiris jáne aýyl sharýashylyǵy salasy baıaý damydy. Kommýnaldyq-sharýashylyq, energetıka, sý, jol ınfraqurylymynyń ábden tozyǵy jetti, — dedi Memleket basshysy.
Qazir ahýal Úkimettiń naqty maqsattarǵa saı jumysynyń arqasynda birtindep ózgerip jatyr.
— Biz memleketimizdiń jańa ındýstrııalyq, energetıkalyq jáne ınfraqurylymdyq arqaýyn, ıaǵnı karkasyn jasaýǵa kiristik. Mysaly, óńdeý ónerkásibiniń damý qarqyny eki jyl qatarynan 6 paıyzdan asyp otyr. Bul úderis aımaqtardyń myqty ekonomıkalyq negizin qalyptastyrýǵa múmkindik beredi.
Byltyrdyń ózinde elimizdiń ár túkpirinde jalpy quny 1,5 trıllıon teńge bolatyn 190 óndiris orny iske qosyldy. 22 myńnan astam turaqty jumys orny ashyldy.
Al bıyl Úkimettiń boljamy boıynsha quny 1,7 trıllıon teńge bolatyn 200 kásiporyn qyzmetin bastaıdy. Onda 20 myńǵa jýyq jumys ornyn ashý josparlanǵan, — dedi ol.
Osylaısha, Qazaqstannyń burynǵy ındýstrııalyq qýaty jandana túsedi. Ónerkásiptiń múlde jańa salalary paıda bolady. Mysal retinde mashına qurastyrý jáne elektr tehnıkasynyń jabdyqtaryn jasaý salasyn aıtýǵa bolady».
