Elimizdiń ár óńirinen kelgen oqýshylar Aqordany aralady
ASTANA. KAZINFORM – Halyqaralyq balalardy qorǵaý kúnine oraı Prezıdent rezıdentsııasy barlyq oblystan kelgen 100 oqýshyǵa esigin aıqara ashty. Bul týraly Aqorda habarlady.
Aqordada pán olımpıadalarynyń jeńimpazdary men júldegerleri, oqý ozattary, shyǵarmashylyq baıqaýlardyń jáne sport saıystarynyń laýreattary qonaq boldy.
Kishkentaı meımandarǵa ǵımarat qurylysynyń tarıhy men sáýlettik erekshelikteri týraly syr shertetin qyzyqty ekskýrsııa uıymdastyryldy.
Oqýshylar resmı qabyldaý ótetin zaldarmen, Memleket basshysynyń kitaphanasymen tanysyp, rezıdentsııa aýmaǵyndaǵy baqta serýendedi.
Jetkinshekter Qazaqstan tarıhy týraly jan-jaqty málimet alyp, Táýelsizdik qundylyqtarynyń mańyzyna boılady.
Ekskýrsııa sońynda balalarǵa Prezıdent atynan estelik syılyqtar tabystaldy.
Aıta keteıik, «Ulttyq qor – balalarǵa» jobasy aıasynda balalarǵa 2,3 mlrd dollar bólindi.
