Elimizdiń Ánuranyn Japonııa tórinde oınatamyn dep armandaǵan edim — Adelına Zems
NAGOıA.KAZINFORM — Qazaqstandyq jeńil atlet Adelına Zems Japonııada ótip jatqa HH jazǵy Azııa oıyndarynda kúmis medal jeńip alǵannan keıin Kazinform tilshisine suhbat berdi.
Otandasymyz chempıondyqqa bir taban jetpeı qalǵanyn ókinishpen jetkizdi.
- Japonııa, arena atmosferasy maǵan qatty unady. Osy jerde kásipqoı mansabymda eń úzdik nátıjeni tirkedim. Azıadaǵa altyn medal úshin keldim, elimizdiń Ánuranyn Japonııa tórinde shyrqatýdy armandaǵan edim. Alaıda kúmis buıyrdy. Men qolymnan kelgenin jasadym, - dedi sportshy.
Adelına Azııa oıyndary altyn júldesi ózi úshin aıryqsha mańyzdy ekenin aıtty.
- Qarsylasym BAÁ sportshysymen halyqaralyq jarystarda kóp kezdesip júrmiz. Osyǵan deıin men jabyq keshendegi Azııa chempıonatynda tórt ret top jaryp, Azııa chempıonatynda kúmis jáne qola jeńip aldym. Bul – birinshi Azııa oıyndary jarys jolyna shyǵýym. Sol sebepti altyn medal qatty qaladym, onyń men úshin mańyzy aıryqsha edi. Alda taǵy ulken básekeler kútip túr. Men sol baıraqty básekelerde el namysyn abyroımen qorǵaǵym keledi, - dedi ol.
Sóz sońynda qazaqstandyq jelaıaq bapkerine jáne qoldaý kórsetken Qazaqstan halqyna alǵysyn aıtty.
Eske salaıyq, qazaqstandyq jeńil atlet Adelına Zems búgin áıelder arasynda 400 metrge kedergi arqyly júgirýden aqtyq synda 54.58 sekýnd ýaqytta máre syzyǵyn ekinshi bolyp kesti.
Osyǵan deıin habarlaǵanymyzdaı, Alekseı Chýrkın jáne Nurǵısa Ádiletuly aýyr atletıkadan Azıadanyń kúmis júldegeri atanǵan bolatyn.
