Elimizdiń ákimshilik-aýmaqtyq qurylysyn jetildiretin zań jobasy ázirlendi — Jumanǵarın
ASTANA. KAZINFORM — Elimizdiń ákimshilik-aýmaqtyq qurylysyn jetildiretin zań jobasy ázirlendi. Bul týraly Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.
— «Qazaqstan Respýblıkasynyń ákimshilik-aýmaqtyq qurylysy týraly» Konstıtýtsııalyq zańnyń jobasy elimizdiń ákimshilik-aýmaqtyq qurylysyn jetildirý maqsatynda ázirlendi jáne ol jekelegen normalardy naqtylaýǵa, sonymen qatar quqyqtyq qoldaný praktıkasyn jetildirýge baǵyttalǵan. Konstıtýtsııalyq zańnyń jobasy oblys, aýdan, qala, aýyldyq eldi mekender sanattaryn belgileýdi, olardy qurý jáne qaıta qurý boıynsha quzyretti organdardyń ókilettikterin aıqyndaýdy qamtıdy, — dedi vıtse-premer.
Onyń aıtýynsha, zań jobasy memlekettiń aýmaqtyq tutastyǵy men ornyqtylyǵyn kózdeıdi. Sonymen qatar, Konstıtýtsııalyq zań deńgeıinde astananyń mártebesi aıqyndalatyn bolady.
— Bul elordanyń turaqty damýyn qamtamasyz etedi, qalalyq ortanyń sapasyn, qala turǵyndarynyń ómir súrýiniń jaılylyq deńgeıin jáne memlekettik basqarýdyń tıimdiligin arttyrýǵa septigin tıgizedi. Budan basqa konstıtýtsııalyq zań jobasy elordadaǵy jergilikti basqarýdyń erekshelikterin, máslıhat pen ákimdiktiń qala qurylysy, kóshi-qon, kólik, jer jáne taǵy basqa máselelerdi kózdeıdi. Qazirgi ýaqytta ákimshilik-aýmaqtyq qurylys týraly jáne astananyń mártebesi týraly konstıtýtsııalyq zań jobalaryna retteýshi saıasattyń konsýltatıvtik qujattary memlekettik organdarmen kelisildi jáne «Ashyq normatıvtik-quqyqtyq aktiler» portalynda ornalastyryldy. Belgilengen rásimderge sáıkes zań jobalary Parlament Májilisiniń qaraýyna osy jyldyń sáýir aıynyń sońyna deıin engiziletin bolady, — dedi Serik Jumanǵarın.
Aıta keteıik, Úkimet jańa Konstıtýtsııa normalaryn júzege asyrý joldaryn talqylap jatyr.
