Elimizdiń agrarlyq óndirisi aıtarlyqtaı ósken

ASTANA. KAZINFORM – Eksport kólemi de ulǵaıǵan. Bul jóninde QR Aýyl sharýashylyǵy vıtse-mınıstri Erbol Tasjúrekov Óńirlik ekologııalyq sammıttiń azyq-túlik qaýipsizdigi jónindegi taqyryptyq sessııasynda málimdedi.

Onyń sózinshe, elimizdiń agrarlyq óndiris kesheni sońǵy úsh jylda turaqty oń dınamıka kórsetip otyr.

– Aýyl sharýashylyǵynyń jalpy ónimi byltyr 20 mlrd dollarǵa jetti, ıaǵnı 5,9%-ǵa ósken. Al ınvestıtsııalar kólemi 53%-ǵa artyp, 3,2 mlrd dollar boldy. Bul kezdeısoq ósim emes. Investorlarǵa jaıly jaǵdaı jasaý baǵytyndaǵy júıeli jumystyń nátıjesi, – dedi vıtse-mınıstr.

Sonymen birge, onyń aıtýynsha, Qazaqstan azyq-túlikpen ózin-ózi qamtamasyz etip qana qoımaı, ónimderin shet memleketterge satýdy ulǵaıtqan.

– Sońǵy 5 jylda ónimderdi eksporttaý kólemi eki ese ósip, 7 mlrd dollarǵa jetti. 15,3 mln tonna bıdaı men astyq eksporttaldy. Byltyr Orta Azııa memleketterimen taýar aınalymy 3,5 mlrd dollarǵa jetti, ıaǵnı 30%-ǵa joǵarylaǵan. Eń mańyzdysy, biz óńdelgen ónimderdi eksporttap jatyrmyz. Onyń kólemi 38%-ǵa artyp, 3,6 mln dollar boldy, – dedi Erbol Tasjúrekov.

Aıta keteıik, buǵan deıin jahandyq ekologııalyq apattardyń qalaı aldyn alýǵa bolatynyn jazǵanbyz.