Elimizdiń 6 qalasynda aýa sapasy nasharlaıdy

ASTANA. KAZINFORM — «Qazgıdromet» RMK elimizdegi aýa sapasyna qatysty boljamyn jarııalady. 

— 2026 jylǵy 3 aqpanda aýanyń lastanýynyń qolaısyz meteorologııalyq jaǵdaılary Kókshetaý, Pavlodar, Aqtóbe, Almaty, Astana, túnde Atyraý qalalarynda kútiledi, — delingen habarlamada.

Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.

Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.

Buǵan deıin aqpannyń alǵashqy kúnderi aýa raıy qandaı bolatyny týraly jazdyq.