Elimizdiń 5 oblysynda «Aýyldy damytý komandasy» pılottyq jobasy iske qosylady
ASTANA. KAZINFORM — Qazaqstannyń 5 oblysynda aýyl turǵyndarynyń tabysyn arttyrýǵa jáne otbasylarǵa naqty qajettilikterine qaraı qoldaý kórsetýge baǵyttalǵan «Aýyldy damytý komandasy» pılottyq jobasy iske qosylady, dep habarlaıdy Ulttyq ekonomıka mınıstrligi.
Jańa tásil ár otbasynyń qajettilikteri men múmkindikterin eskere otyryp, jeke jumys júrgizýdi kózdeıdi. Negizgi maqsat — aýyl turǵyndaryna jumys tabýǵa, qajetti daǵdylardy meńgerýge, óz isin ashýǵa jáne tabysyn arttyrýǵa kómektesý.
Pılottyq joba Túrkistan, Jambyl, Batys Qazaqstan, Pavlodar jáne Qostanaı oblystarynda júzege asyrylady. Komandalar quramyna jumyspen qamtý, kásipkerlik, aýyl sharýashylyǵy, sondaı-aq áleýmettik jáne quqyqtyq kómek kórsetý baǵyttarynyń mamandary kiredi. Olar aýyl otbasylaryna qoljetimdi qoldaý sharalaryn paıdalanýǵa kómektesip, oqýdan bastap grant alýǵa jáne óz isin bastaýǵa deıin súıemeldeıdi.
Aýdan deńgeıinde jumysty «Aýyl menedjeri» úılestiredi. Ol turǵyndarǵa jumysqa ornalasý, bilim alý, granttar men jeńildetilgen kredıtter alý múmkindikterin paıdalanýǵa kómektesedi. Saýran aýdanynyń Babaıqorǵan aýyldyq okrýginde «Aýyl menedjeri» jumysqa kiristi. Munda komanda jasaqtalyp, aýyl turǵyndaryn qoldaý jónindegi is-qımyl jospary bekitildi.
Qoldaý quraldarynyń biri — jyldyq 2,5% mólsherlememen jeńildetilgen mıkrokredıt berýdi kózdeıtin «Aýyl amanaty» jobasy.
Aıta keteıik, Qazaqstan men Belarýs 2027 jyly elektrondyq ruqsattardy qoldaný boıynsha pılottyq jobany iske asyrady.
