Elimizdiń 45 qalasynda káriz tazartý qurylysy jańartylmaq

ASTANA. KAZINFORM — Elimizdiń 45 qalasynda káriz tazartý qurlystary jańartylmaq. Bul týraly búgin Úkimet otyrysynda Ónerkásip jáne qurylys vıtse-mınıstri Qýandyq Qajkenov aıtty.

— Qazirde salanyń basty problemalyq máseleleriniń biri — qalalyq káriz tazartý qurylystarynyń eskirýi. Olardyń basym bóligi 50 jyldan astam ýaqyt buryn salynǵan jáne ortasha tozý deńgeıi 65 paıyzdan asyp, sanıtarlyq jaǵdaıǵa tikeleı áser etýde. 2025 jyldyń qorytyndysy boıynsha Aqtaý jáne Lenger qalalarynda jańa káriz tazartý qurylystary iske qosyldy. Osy jyldyń sońyna deıin Atyraý, Qyzylorda, Qarqaraly jáne Qarajal qalalarynda taǵy 4 tazartý qurylystaryn iske qosý josparlanýda, — dedi ol.

Vıtse-mınıstrdiń aıtýynsha, halyqaralyq qarjy uıymdarynyń nesıeleri, «Báıterek» holdıngi arqyly oblıgatsııalyq nesıeler, memlekettik-jekeshelik áriptestik mehnızmi jáne arnaıy transfertter sııaqty ártúrli qarjylandyrý kózderi arqyly taǵy 45 qalada osyndaı jobalardy júzege asyrý kózdelgen. Onyń ishinde 7 joba Eýropa damý jáne qaıta qurý jáne Azııa damý bankteriniń nesıesi arqyly júzege asyrylady.

— Jobany ótinimnen bastap nysandy paıdalanýǵa berýge deıingi búkil ómirlik tsıkldi qamtıtyn keshendi tásildi qamtamasyz etý maqsatynda 2025 jylǵy qarashadan bastap Ulttyq joba aıasynda Birtutas elektrondyq platforma iske qosyldy. Elektrondyq platforma 5 negizgi modýlden turady jáne qazirgi tańda ol jerde mınıstrliktiń quzyreti aıasynda 89 joba tirkelgen, olardyń ishinen tozý deńgeıi joǵary 31 joba anyqtalǵan. Jobalardy iske asyrý mınıstrliktiń baqylaýynda, — dedi Qýandyq Qajkenov.

Aıta keteıik, Úkimet otyrysynda sýmen jabdyqtaý jáne sý burý júıelerin damytý, tsıfrlandyrý men sý únemdeý tehnologııalaryn engizý sharalaryn talqyǵa salynyp jatyr.