Elimizdiń 4 joǵary oqý ornynda «Etnosaıası saýattylyq» páni engizildi
ASTANA. KAZINFORM — «Etnosaıasattaný» jáne «Etnojýrnalıstıka» baǵyttary boıynsha baǵdarlamalary bar joǵary oqý oryndarynyń sanyn arttyrý jumystary júrgizilýde, dep habarlaıdy Mádenıet jáne aqparat mınıstrligi.
2024 jyly QR Mádenıet jáne aqparat mınıstrligi Qazaqstan halqy Assambleıasynyń 2022–2026 jyldarǵa arnalǵan damý tujyrymdamasyn sátti iske asyrdy. Osy jumystar aıasynda 9 myńnan astam is-shara uıymdastyrylyp, 700 myńnan astam adam qamtyldy.
Jyldyń mańyzdy oqıǵalarynyń biri — 25 sáýirde Memleket basshysynyń tóraǵalyǵymen ótken Qazaqstan halqy Assambleıasynyń XXXIII sessııasy. Bul sharaǵa 1500-den astam adam, sonyń ishinde QHA músheleri, Parlament depýtattary jáne etnomádenı birlestikterdiń ókilderi qatysty.
Aqparattyq salada da mańyzdy jobalar júzege asyrylyp, 6 derekti fılm túsirildi. Mysaly, «Otandastar», «Birlik besigi», «Shańyraq» baǵdarlamasy sııaqty kóp serııaly derekti fılmder jaryq kórdi.
Sondaı-aq, Qazaqstannyń birqatar qalalarynda QHA Jýrnalıster klýbynyń otyrystary ótti. Onda etnosaralyq qaqtyǵystardyń aldyn alý, «arazdyq tilin» anyqtaý jáne aldyn alý, etnosaralyq saladaǵy faktchekıng ádisteri talqylandy.
— Bilim berý salasynda elimizdiń tórt joǵary oqý ornynda «Etnosaıası saýattylyq» páni engizildi. «Etnosaıasattaný» jáne «Etnojýrnalıstıka» baǵyttary boıynsha baǵdarlamalary bar joǵary oqý oryndarynyń sanyn arttyrý jumystary júrgizilýde, — delingen habarlamada.
Elimizdiń jastaryna arnalǵan «Birlik» halyqaralyq jastar lageri jáne QHA-nyń «Til mektebi» uıymdastyryldy.
Sonymen qatar, «Bir el» jáne «Beıbitshilik pen kelisim jolymen» jobalary júzege asyryldy.
22 qarashada Astanada Qazaqstan halqy Assambleıasynyń «Myń bala» mádenı-aǵartý jobasynyń jeńimpazdaryn marapattaý rásimi ótti. Joba qazaqstandyq biregeılikti damytýǵa jáne halyqtyń birligin nyǵaıtýǵa baǵyttalǵan. Maqsaty — mektep oqýshylary men túrli etnos jastary arasynda memlekettik til arqyly ulttyq qundylyqtardy nasıhattaý.
2025 jyly Qazaqstan halqy Assambleıasynyń qurylǵanyna 30 jyl tolady. Osyǵan oraı, 5 myńnan astam túrli formattaǵy is-sharalar josparlanǵan.
Buǵan deıin Gvıneıa-Bısaý jastary Qazaqstannyń joǵary tehnıkalyq oqý oryndarynda bilim alǵysy keletinin jazǵan edik.