Elimizdiń 24 feldsheri vedomstvolyq nagradalarmen marapattaldy
ASTANA. KAZINFORM — 4 feldsher «Densaýlyq saqtaý isiniń úzdigi» tósbelgisine, 11 feldsher «Densaýlyq saqtaý salasyn damytýǵa qosqan úlesi úshin» belgisine, 9 feldsher Qurmet gramotasyna ıe boldy, dep habarlaıdy DSM baspasóz qyzmeti.
Densaýlyq saqtaý mınıstrliginde jyl qorytyndysy boıynsha jedel medıtsınalyq járdem qyzmetiniń úzdik feldsherlerin marapattaýǵa arnalǵan saltanatty is-shara ótti. Olar — táýekeli joǵary, emotsıonaldyq júktemesi aýyr jaǵdaıda eńbek etetin eń kúrdeli mamandyq ıeleriniń ókilderi. Іs-sharanyń alǵashqy mınýttarynda qatysýshylar kásibı mindetin atqarý kezinde qaza tapqan áriptesteriniń — Uldana Myrzýan men Nasıba Janabaevanyń — jarqyn esteligine bir mınýt únsizdikpen taǵzym etti. Olardyń esimderi otandyq densaýlyq saqtaý tarıhynda máńgi saqtalyp, kásibı ar-namys, batyldyq pen adamgershiliktiń úlgisi retinde medıtsınalyq qyzmetkerlerdiń jańa býynyn shabyttandyra beredi.
Mınıstrlik apparatynyń basshysy Bolat Tókejanov jedel járdem feldsherlerine janqııarlyq eńbegi, erligi men mamandyqqa adaldyǵy úshin alǵysyn bildirip, úzdik mamandardy marapattaý rásimin ótkizdi. Qazaqstan Respýblıkasy Densaýlyq saqtaý mınıstrliginiń 2025 jylǵy 24 jeltoqsandaǵy № 24 buıryǵyna sáıkes, elimizdiń 24 feldsheri vedomstvolyq nagradalarmen marapattaldy. Atap aıtqanda, 4 feldsher «Densaýlyq saqtaý isiniń úzdigi» tósbelgisimen, 11 feldsher «Densaýlyq saqtaý salasyn damytýǵa qosqan úlesi úshin» belgisimen (onyń ishinde bireýi — qaıtys bolǵannan keıin), 9 feldsher Qurmet gramotasymen marapattaldy.
— Búgin biz jedel járdem feldsherlerine — medıtsınanyń aldyńǵy shebinde eńbek etip, sanaýly mınýttar ishinde sheshim qabyldap, tótenshe jaǵdaılarda adam ómirin saqtap qalatyn jandarǵa qurmet kórsetý úshin jınaldyq. Bul — jaı ǵana marapattaý rásimi emes, bul — tereń alǵys pen qoǵamdyq moıyndaýdyń kórinisi, — dep atap ótti QR Densaýlyq saqtaý mınıstrliginiń apparat basshysy Bolat Tókejanov.
Budan buryn qyzmet barysynda qaza tapqan feldsher Uldana Myrzýanǵa arnalǵan eskertkish taqta ornatylǵanyn jazǵan edik.