Elimizdiń 23 qalasynda káriz tazartatyn qondyrǵy múldem joq

ASTANA. KAZINFORM — Elimizdiń 23 qalasynda káriz tazartatyn qondyrǵy múldem joq. Bul týraly Ónerkásip jáne qurylys Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov aıtty.

Onyń dereginshe, elimizdegi ınjenerlik jelilerdiń uzyndyǵy 136 myń shaqyrymdy quraıdy. Olardyń tozý dárejesi baǵytyna qaraı ózgerip otyrady. Máselen, sý burý jelileriniń 55 paıyzy tozsa, jylýmen jabdyqtaýda bul kórsetkish 52 paıyzǵa, sýmen jabdyqtaýda 39 paıyzǵa jetken. Al ortalyqtandyrylǵan júıeler arqyly halyqqa jetkiziletin sýdyń sapasy jelilerdiń jaǵdaıyna tikeleı baılanysty. Bul jeliler ár túrli qarjylandyrý kózderin paıdalana otyryp, jyl saıyn jańartylyp otyrady.

Respýblıkadaǵy 90 qalanyń 60-ynda ǵana káriz tazartatyn qondyrǵy bar. Olardyń tozýynyń ortasha deńgeıi 65 paıyzǵa jetip otyr. Tek 21 nysan halyqtyń suranysyn tolyq qanaǵattandyrady. 23 qalada káriz tazartatyn qondyrǵylar múldem joq. Onyń 13-inde halyq sanynyń azdyǵyna jáne ortalyqtandyrylǵan káriz júıesiniń joqtyǵyna baılanysty tazartý qondyrǵylarynyń qurylysy keıinge qaldyrylǵan.

— Jeti qalada jalpy somasy 30 mlrd teńgege káriz tazartatyn qondyrǵylardy qaıta jańǵyrtý jáne salý jumystary júrgizilip jatyr. Ótken jyly Fort-Shevchenko jáne Saryaǵash qalalarynda káriz tazartatyn qondyrǵylardy salý jáne qaıta jańartý jumystary aıaqtaldy. Bıyl Qyzylorda jáne Lenger qalalarynyń káriz tazartatyn qondyrǵylary qurylysyna 1,7 mlrd teńge kóleminde qarjylandyrý qarastyryldy. Qonaevta káriz tazartatyn qondyrǵyny jańǵyrtý memlekettik-jekeshelik áriptestik tetigi arqyly júrgizilýde, — dedi Baqytjan Júnisbekov.

Osy oraıda ol kommýnaldyq ınfraqurylymdy jańartý máselesin sheshý úshin ótken jyldyń jeltoqsan aıynda «Energetıka jáne kommýnaldyq sektordy jańǵyrtý» ulttyq jobasy qabyldanǵanyn aıtady. Jobada 32 káriz tazartatyn qondyrǵyny qaıta jańǵyrtý jáne 13 jańasyn salý josparlanǵan. 8 joba halyqaralyq qarjy uıymdary, 14 joba oblıgatsııalyq nesıe, al 23 joba respýblıkalyq bıýdjet esebinen qarjylandyrylady.

Buǵan deıin qala men aýyl turǵyndarynyń qansha paıyzy taza aýyz sýmen qamtylǵanyn jazǵan edik.