Elimizdiń 22 jasqa deıingi erler quramasy Azııa chempıonatynda 10 altyn aldy

ASTANA. KAZINFORM — Shrı-Lanka astanasy Kolombo qalasynda ótken Azııa chempıonatynda 22 jasqa deıingi jastar arasyndaǵy Qazaqstan erler quramasy 10 altyn medal aldy.

Qurlyqtyq doda 10-24 mamyr aralyǵynda ótkizildi. Oǵan 19 elden 74 boksshy keldi.Onda 13 salmaqtyń 12-de qazaqstandyq bylǵary qolǵap sheberleri fınalǵa deıin jetti. Onyń ishinde 10-y jeńis tuǵyryna kóterilse, 2-i kúmis medaldy qanaǵat tutty. 

Qurama sapynan Kenje Muratuly (54 keli) ǵana birinshi jekpe-jekte ese jiberip, júldege qol jetkize alǵan joq.

Qazaqstandyq boksshylar arasynan Tileýberdi Súleımen (48 keli), Dıas Berikbaı (51 keli), Jasýrbek Anorbaev (57 keli), Nurıslam Qaldybaev (60 keli), Baqtııar Anarbaev (67 keli), Aǵajan Qadyr (71 keli), Aman Qonysbekov (75 keli), Baqbergen Álıasqarov (80 keli), Ibragım Betaev (86 keli), Azatbek Joldashan (92 keli) chempıon atandy.

Al Seraly Jolmaǵanbet (63,5 keli) pen Ersultan Sapar (92 keliden joǵary) kúmis medal ıegerleri boldy.

Erler quramasynda Qazaqstan jalpy esepte kósh bastasa, odan keıingi oryndardy Qyrǵyzstan — 9 (2 altyn, 4 kúmis, 3 qola), Tájikstan — 6 (1 altyn, 2 kúmis, 3 qola) medalmen ózara bólisti.

Elimizdiń 22 jasqa deıingi erler quramasy óz tarıhynda úshinshi márte 22 jasqa deıingi Azııa chempıonatynda júldege talasty. Alǵash ret 2023 jyly Taılandta otandastarymyz 3 altyn, 3 kúmis, 5 qola alsa, 2024 jyly Astanada 8 altyn, 5 kúmis medalmen jarysty aıaqtaǵan edi.

Eske salsaq, budan buryn Azııa chempıonatynda 22 jasqa deıingi qyzdar arasynda qazaqstandyq 9 boksshy altyn aldy.