Elimizdiń 17 óńiriniń turǵyndaryna eskertý jasaldy — Qazgıdromet
ASTANA. KAZINFORM — «Qazgıdromet» RMK 2 maýsymda aýa raıyna baılanysty qazaqstandyqtarǵa eskertý jarııalady. Elimizdiń 17 oblysynda jańbyr, naızaǵaı, burshaq, ekpindi jel jáne joǵary órt qaýpi boljanyp otyr.
Túrkistan oblysynda qysqa merzimdi jańbyr men naızaǵaı kútiledi. Taýly aýdandarda jeldiń jyldamdyǵy 15-20 m/s-qa deıin jetedi. Oblys ortalyǵynda joǵary órt qaýpi saqtalady.
Mańǵystaý oblysynda jańbyr, naızaǵaı jáne burshaq boljanady. Soltústik-shyǵys bóliginde jel ekpini 15-20 m/s bolady. Aqtaýda kúndiz jańbyr jaýyp, naızaǵaı oınaıdy.
Qyzylorda oblysynyń batysynda, soltústiginde jáne ońtústiginde tótenshe órt qaýpi, qalǵan aýmaqtarynda joǵary órt qaýpi saqtalady.
Aqtóbe oblysynda jańbyr men naızaǵaı kútiledi. Túnde jáne tańerteń oblystyń soltústiginde tuman túsedi. Jeldiń ekpini 15-18 m/s-qa jetedi. Aqtóbede de jańbyr, naızaǵaı jáne tuman boljanǵan.
Almaty oblysynda qysqa merzimdi jańbyr men naızaǵaı bolady. Jeldiń ekpini 15-20 m/s-qa deıin kúsheıedi. Kúndiz aýa temperatýrasy 35-36 gradýsqa deıin ysıdy. Oblystyń soltústiginde joǵary jáne tótenshe órt qaýpi saqtalady.
Almatyda kúndiz qysqa merzimdi jańbyr jaýyp, naızaǵaı bolady. Qonaevta jeldiń ekpini 15-20 m/s-qa deıin jetedi. Іle Alataýynyń taýly aımaqtarynda da jańbyr men naızaǵaı kútiledi.
Qaraǵandy oblysynda jańbyr men naızaǵaı kútiledi, oblystyń shyǵysynda jańbyr jaýyp, naızaǵaı oınaıdy, kúndiz soltústik jáne shyǵys aýdandarda da jańbyr men naızaǵaı boljanady. Túnde jáne tańerteń oblystyń batysynda, soltústiginde jáne shyǵysynda tuman túsedi. Soltústik-batystan soqqan jel kúndiz oblystyń shyǵysy men ońtústiginde sekýndyna 15-20 metrge deıin kúsheıedi. Kúndiz oblystyń ońtústiginde aptap ystyq bolyp, aýa temperatýrasy 35 gradýsqa deıin kóteriledi. Oblystyń batysynda, soltústiginde jáne ortalyǵynda tótenshe órt qaýpi saqtalady. Qaraǵandy qalasynda túnde azdaǵan jańbyr jaýyp, naızaǵaı oınaıdy, kúndiz jańbyr men naızaǵaı kútiledi. Túnde jáne tańerteń tuman bolady. Qala aýmaǵynda da tótenshe órt qaýpi saqtalady.
Ulytaý oblysynda azdaǵan jańbyr jaýyp, naızaǵaı kútiledi. Túnde jáne tańerteń oblystyń soltústiginde, shyǵysynda jáne ortalyǵynda tuman bolady. Jezqazǵan qalasynda da túnde jáne tańerteń tuman túsýi boljanyp otyr.
Atyraý oblysynda jańbyr jaýyp, naızaǵaı oınaıdy. Kúndiz oblystyń ońtústigi men shyǵysynda da jańbyr men naızaǵaı kútiledi. Atyraý qalasynda tańerteń jáne kúndiz jańbyr jaýyp, naızaǵaı bolady.
Batys Qazaqstan oblysynda jańbyr jaýyp, naızaǵaı kútiledi. Kúndiz oblystyń batysy men soltústiginde burshaq jaýyp, daýyl bolýy múmkin. Ońtústik-batystan soqqan jel kúndiz soltústik-batys baǵytqa aýysyp, oblystyń ońtústigi men shyǵysynda ekpini sekýndyna 15-20 metrge jetedi. Oblystyń batysy men ortalyǵynda joǵary órt qaýpi saqtalady. Oral qalasynda jańbyr jaýyp, naızaǵaı kútiledi. Kúndiz burshaq jaýyp, daýyl bolýy múmkin.
Shyǵys Qazaqstan oblysynda jańbyr men naızaǵaı boljanady. Keı jerlerde jeldiń jyldamdyǵy 15-20 m/s bolady. Oblystyń ońtústiginde joǵary órt qaýpi saqtalady.
Abaı oblysynda jańbyr, naızaǵaı jáne burshaq kútiledi. Ońtústiginde aýa temperatýrasy 37 gradýsqa deıin kóteriledi. Keı aýdandarda tótenshe órt qaýpi saqtalady. Semeı qalasynda kúnniń ekinshi jartysynda jańbyr jaýyp, naızaǵaı kútiledi. Ońtústik-shyǵystan soqqan jel kúndiz soltústik-batys baǵytqa aýysyp, ekpini sekýndyna 15-20 metrge deıin jetedi.
Jambyl oblysynda qysqa merzimdi jańbyr jaýyp, naızaǵaı kútiledi. Jel soltústik-batystan soǵady, oblystyń ońtústik-batysynda, soltústik-shyǵysynda jáne taýly aımaqtarynda jyldamdyǵy 15–20 m/s bolady. Oblystyń batysy men ortalyǵynda joǵary órt qaýpi saqtalady. Taraz qalasynda qysqa merzimdi jańbyr jaýyp, naızaǵaı kútiledi.
Soltústik Qazaqstan oblysynda jańbyr jaýady. Oblystyń batysy men soltústiginde naızaǵaı oınap, kúndiz burshaq jaýýy múmkin. Túnde jáne tańerteń batysy men shyǵysynda tuman túsedi. Jel soltústik-shyǵystan soǵyp, ońtústik pen shyǵysta keıin batys baǵytqa aýysady, ekpini 15–20 m/s-qa jetedi. Oblystyń soltústik-shyǵysy men ońtústik-batysynda joǵary órt qaýpi saqtalady. Petropavl qalasynda azdaǵan jańbyr, naızaǵaı kútiledi, kúndiz burshaq jaýýy múmkin.
Aqmola oblysynda jańbyr jaýyp, naızaǵaı kútiledi, soltústigi men shyǵysynda qatty jańbyr men burshaq bolýy múmkin. Kúndiz soltústik pen shyǵysta azdaǵan jańbyr men naızaǵaı saqtalady. Túnde jáne tańerteń batysy men ońtústiginde tuman túsedi. Jel soltústik-shyǵystan soǵyp, túnde soltústik, ońtústik jáne shyǵys bólikterinde soltústik-batysqa aýysyp, ekpini 15–20 m/s-qa jetedi. Oblystyń batysy men shyǵysynda joǵary órt qaýpi saqtalady. Kókshetaý qalasynda túnde jańbyr jaýyp, naızaǵaı kútiledi.
Jetisý oblysynda qysqa merzimdi jańbyr men naızaǵaı kútiledi. Aýa temperatýrasy 35 gradýsqa deıin kóteriledi. Birqatar aýdandarda tótenshe órt qaýpi saqtalady.
Qostanaı oblysynda jańbyr men naızaǵaı bolady. Keı jerlerde tuman kútiledi. Oblystyń ońtústigi men shyǵysynda joǵary órt qaýpi saqtalady.
Pavlodar oblysynda jańbyr, naızaǵaı, keı jerlerde qatty jańbyr men burshaq boljanady. Jeldiń ekpini 15-20 m/s bolady. Pavlodar qalasynda da jańbyr men naızaǵaı kútiledi.
Osydan buryn ShQO-da maýsym aıynda aptap ystyq bolyp, keıde nóser jańbyr jaýatynyn jazdyq.
