Elimizdiń 17 óńirinde turǵyn úıdi paıdalanýǵa berýde oń dınamıka baıqalady - Ónerkásip mınıstrligi
ASTANA. KAZINFORM — Atyraý oblysynan basqa barlyq oblysta qurylys salasynda oń ósim bar. Bul týraly búgin Úkimet otyrysynda Ónerkásip jáne qurylys vıtse-mınıstri Oljas Saparbekov aıtty.
- 11 aıdyń qorytyndysy boıynsha qurylys jumystarynyń kólemi shamamen 8,1 trln teńge bolyp, ótken jyldyń sáıkes kezeńimen salystyrǵanda 14,7 paıyzǵa artty. Atyraý oblysynan basqa barlyq 19 oblys boıynsha oń ósý serpini saqtalyp otyr. Bul salanyń júıeli túrde damyp, josparlanǵan sharalardyń tıimdi iske asyrylyp jatqanynyń nátıjesi, - dedi ol.
Vıtse-mınıstrdiń aıtýynsha, bıylǵy turǵyn úı salasyndaǵy jospar 19,2 mıllıon sharshy metr bolyp belgilendi. 11 aıdyń qorytyndysy boıynsha 16,9 mıllıon sharshy metr turǵyn úı paıdalanýǵa berilip, ótken jylmen salystyrǵanda kórsetkish 3,9 paıyz artty.
- Elimizdiń 17 óńirinde osy baǵytta oń dınamıka baıqalyp otyr. Eń kóp ósim Jetisý, Qaraǵandy jáne Almaty oblystarynda tirkelgen. Abaı, Atyraý jáne Mańǵystaý oblystary tómen kórsetkishterge ıe bolyp otyr, - dedi Oljas Saparbekov.
Aıta keteıik, Úkimet eldiń 11 aıdaǵy áleýmettik-ekonomıkalyq damý qorytyndylaryn qarap jatyr.