Elimizdiń 10 oblysynda jańadan 20 sý qoımasy salynady
ASTANA. KAZINFORM — QR Sý resýrstary jáne ırrıgatsııa mınıstrligi kóktemdegi sý tasqynynan keıin el aýmaǵynda salynatyn sý qoımasy men bógenderge qatysty túsinik berdi.
«Elimizdegi segiz negizgi sý sharýashylyq basseınderiniń jeteýi transshekaralyq bolǵandyqtan, Qazaqstan Respýblıkasy kórshi elderden aǵyp keletin sý aǵynyna tikeleı táýeldi. Oǵan qosa, elimiz boıynsha sý resýrstary birkelki shoǵyrlanbaǵan. Jyl saıyn aýyl sharýashylyǵy qarqyndy damyǵan elimizdiń ońtústik óńirlerinde sýarý maýsymynda aıtarlyqtaı sýmen qamtamasyz etý problemalary týyndap otyratyny bar. Atalǵan problemalardy sheshý maqsatynda Tujyrymdama aıasynda gıdrotehnıkalyq qurylystardy rekonstrýktsııalaý men olardy salý jáne transshekaralyq kelissózderdi el múddesine saı kúsheıtý jumystary atqarylyp jatyr», - delingen mınıstrliktiń Kazinform agenttigine bergen jaýabynda.
Sonymen qatar vedomstvo bıyl sý tasqynynyń aldyn alý baǵytynda ǵylymı zertteýler júrgiziletinin habarlady.
«Memleket basshysynyń tapsyrmasy boıynsha jańa Sý kodeksiniń jobasyna ózgerister engizilip jatyr. Atap aıtqanda, sý tasqynyn aldyn ala boljaý, josparlaý jáne jedel den qoıý issharalarynyń biryńǵaı júıesin engizý boıynsha jeke taraý daıyndaldy. Memlekettik organdardyń sý tasqynynyń aldyn alý jónindegi negizgi is-sharalary men quzyretteri aıqyndaldy. Sondaı-aq, Tujyrymdamaǵa da ózgerister engiziledi. Sý tasqynynyń aldyn alý jáne odan keletin zalaldy azaıtý úshin keshendi ǵylymı zertteýler júrgizý qarastyrylyp otyr. Sý tasqynyn boljaý men modeldeýdi jetildirý, kadrlyq áleýetti arttyrý, ınfraqurylymdy damytý jónindegi is-sharalar kúsheıtilip jatyr», - dep atalyp ótken Sý mınıstrligi aqparatynda.
Qazirgi kezde tujyrymdamaǵa engiziletin túzetýler basqa memlekettik organdarmen talqylanyp jatqany beligili boldy.
«Sonymen qatar, sý tasqynyna qarsy tıimdi kúres tájirıbesi bar memleketterdegi ozyq sheteldik tájirıbeler zerdelenip otyr. Tujyrymdama aıasynda elimizdiń 10 oblysynda jańadan 20 sý qoımasy salynyp, 15 sý qoımasyn rekonstrýktsııalaý kózdelgen. Salynatyn 20 sý qoımasy bolashaqta 2,5 mlrd tekshe metrge deıin sý jınaı alady», - dep naqtylady mınıstrlik.
