Elimizden kómir tek lıtsenzııa arqyly eksporttalady
ASTANA. KAZINFORM – Kómir eksportyna lıtsenzııa berýdi kózdeıtin Úkimet qaýlysy qabyldandy. Bul týraly Úkimet otyrysynda Ónerkásip jáne qurylys mınıstri Qanat Sharlapaev aıtty.
«Aldaǵy jylytý maýsymyna shamamen 12 myń avtonomdy qazandyq daıyndyq jumystarynan ótti. Avtonomdy qazandyqtar qajetti kómirmen - 93, mazýtpen - 99 jáne dızel otynymen 90 paıyz qamtamasyz etildi. Búgingi kúni bilim berý jáne densaýlyq saqtaý nysandary men turǵyn úıler jylytý maýsymyna tolyqtaı daıyn», - dedi mınıstr.
Onyń atap ótýinshe, kommýnaldyq turmystyq qajettilikke jáne halyqtyń paıdalanýyna arnalǵan kómirge qajettilik 8,2 mln tonnany quraıdy. Jylytý maýsymy bastalǵannan beri shamamen 3 mln tonna jetkizildi. Bul jyldyq jospardyń 37,1 paıyzdy quraıdy. Al ótken jyly jospardyń oryndalýy 35,1 paıyz quraǵan bolatyn.
«Búgingi tańda elimizdiń kómir tuıyqtaryndaǵy túrli markadaǵy otyn qory shamamen 577 myń tonnany quraıdy. Bul ótken jylmen salystyrǵanda 100 myń tonnaǵa artyq. Mınıstrlik tarapynan óńirlerdi kómirmen qamtamasyz etý boıynsha turaqty monıtorıngi júrgizilýde. Qazaqstan temir joly men kómir óndirýshi kásiporyndar kómirdiń qajetti kólemin jetkizýge daıyn. Sonymen qatar, áleýmettik kómirdiń elden tys jerlerge ketýin boldyrmaý maqsatynda kómir eksportyna lıtsenzııa berýdi kózdeıtin Úkimet qaýlysy qabyldandy. Budan bólek, deldaldardyń jumysyn boldyrmaý maqsatynda kómirdi satýdy bırjaǵa shyǵarý boıynsha jumystar júrgizilýde. Soltústik, ortalyq jáne shyǵys óńirlerde jylytý maýsymy bastalyp, halyq tarapynan kómir satyp alý belsendi túrde júrip jatyr. Al ońtústik jáne ońtústik-shyǵys óńirlerde, halyqtyń kómirdi satyp alýy boıynsha aqparattandyrý jumystaryn belsendetý qajet», - dedi Qanat Sharlapaev.
Mınıstrdiń aıtýynsha, barlyq óńirde jylytý maýsymy josparǵa sáıkes bastalyp jatyr. Jóndeý jumystary qalǵan óńirlerde jylý berý bastalǵanǵa deıin aıaqtalatyn bolady. Halyqty kómirmen qamtamasyz etý boıynsha jumystar mınıstrliktiń turaqty baqylaýynda tur.