Elimizden qandaı mamandar ketip jatyr

ASTANA. KAZINFORM — Elimizden syrtqa ketip jatqan mamandardyń 73% eńbekke qabiletti jastaǵy azamattar. Bul týraly Eńbek jáne halyqty áleýmettik qorǵaý vıtse-mınıstri Oljas Anafın málim etti.

— Qazaqstannan halyqtyń turaqty túrde ketýi baıqalady. Máselen, 2019 jyly elden 159 myń azamat birjola ketken, olardyń negizgi bóligi soltústik, ortalyq jáne shyǵys óńirlerine tıesili. Bul shamamen 105 myń adam, — dedi Oljas Anafın Senat qabyrǵasynda ótken is-shara barysynda.

Onyń aıtýynsha, Qazaqstannan ketken azamattardyń 80%-y TMD elderine qonys aýdaryp jatyr. 

— Elden ketkenderdiń 73% eńbekke qabiletti jastaǵy azamattar, olardyń ishinde 30%-y — tehnıka, ekonomıka jáne pedagogıka salasyndaǵy bilikti kadrlar, — dep atap ótti Oljas Anafın.

Degenmen vıtse-mınıstr el ishinde ishki kóshi-qonnyń qarqyn alǵanyn aıtyp otyr.

— 2024 jyly ishki kóshi-qon aıasynda 689,5 myń adam óńirler arasynda qonys aýdardy. Olardyń 411,4 myńy aımaqtarǵa ornalastyryldy. Іshki halyq qozǵalysy boıynsha eń úlken aǵyn Astana, Almaty jáne Shymkent qalalaryna baǵyttalǵan, bul negizgi ishki kóshi-qonnyń 50,6%-yn quraıdy, — dedi vıtse-mınıstr.

Buǵan deıin Oljas Anafın qazaqstandyqtar soltústik óńirlerden kóshý jalǵasyp jatqanyn aıtqan bolatyn.

Búgin Senattyń Áleýmettik-mádenı damý jáne ǵylym komıtetinde «Demografııalyq ósý –ulttyń strategııalyq artyqshylyǵynyń negizi» taqyrybynda byltyr ótken Úkimet saǵatynda qabyldanǵan usynymdardy iske asyrý qorytyndylaryn talqylaýǵa arnalǵan keńeıtilgen otyrys ótti.