Elimizden 2,2 myńnan astam shetel azamatyn shyǵarý týraly sheshim qabyldandy

5–16 qazan aralyǵynda Qazaqstan aýmaǵynda qoǵamdyq tártipti qamtamasyz etýge, kóshi-qon zańnamasyn buzýshylyqtardyń aldyn alýǵa jáne jolyn kesýge, sondaı-aq shetel azamattarynyń elde bolý qaǵıdalaryn saqtaýyn baqylaýdy kúsheıtýge baǵyttalǵan «Nelegal» jedel-profılaktıkalyq is-sharasy ótkizildi.

Іshki ister mınıstrliginiń málimetinshe, is-shara aıasynda polıtsııa qyzmetkerleri jeke jáne zańdy tulǵalar arasynda profılaktıkalyq jumystar júrgizip, kóshi-qon zańnamasynyń talaptaryn jáne olardy buzǵany úshin kózdelgen jaýapkershilikti túsindirdi. Shetel azamattaryna turǵyn úı berý, olardy tirkeý tártibin saqtaý jáne sheteldik jumys kúshin zańsyz tartýǵa jol bermeý máselelerine erekshe nazar aýdaryldy.

Sonymen qatar shetel azamattary shoǵyrlanyp turatyn oryndar, qurylys nysandary, bazarlar, sondaı-aq sheteldik jumysshylardyń eńbegin paıdalanatyn kásiporyndar men uıymdar tekserildi.

Operatsııa qorytyndysy boıynsha kóshi-qon zańnamasy salasynda 15,8 myńnan astam quqyq buzýshylyqtyń joly kesildi.

— Qazaqstanda bolý qaǵıdalaryn buzǵany úshin 7 595 shetel azamaty ákimshilik jaýapkershilikke tartyldy. Eńbek qyzmetin zańsyz júzege asyrǵany úshin taǵy 3 899 shetel azamatyna qatysty sharalar qabyldandy. Tıisti ruqsattarsyz sheteldik jumys kúshin tartqany úshin 815 jumys berýshige qatysty sharalar qoldanyldy. Sondaı-aq shetel azamattarynyń ózderinde bolýy týraly ishki ister organdaryna ýaqtyly habarlamaǵan 3 533 jeke jáne zańdy tulǵa jaýapkershilikke tartyldy, — delingen habarlamada.

Sottar kóshi-qon zańnamasyn buzǵan adamdardy Qazaqstan aýmaǵynan shyǵarý týraly 2 243 sheshim shyǵardy. Budan bólek, elde odan ári bolýyna jol berilmeıdi dep tanylǵan 2 479 shetel azamatynyń elde bolý merzimi qysqartyldy.

Májbúrlep elden shyǵarý sharasy 236 shetel azamatyna qatysty oryndaldy. Olardyń barlyǵyna Qazaqstanǵa bes jyl merzimge kirýge tyıym salyndy.

Tekserý barysynda memlekettik shekarany zańsyz kesip ótken 14 shetel azamaty da anyqtaldy. Atalǵan faktiler boıynsha shekara qyzmetimen birlesip tergep-tekserý jumystary júrgizilip jatyr.

Sonymen qatar izdeýde júrgen jáne óz memleketteriniń quqyq qorǵaý organdarynan Qazaqstan aýmaǵynda jasyrynyp júrgen 62 shetel azamaty ustaldy.

Anyqtalǵan quqyq buzýshylyqtardy taldaý zańsyz kóshi-qonnyń negizgi sebepteriniń biri jekelegen azamattardyń zańda belgilengen talaptardy aınalyp ótip, tez paıda tabýǵa umtylýy ekenin kórsetedi.

Birqatar jaǵdaıda sheteldikterdiń elge zańsyz kirýine Qazaqstan azamattarynyń ózderi yqpal etip, olardyń elde bolýyn uıymdastyrady, turǵyn úımen qamtamasyz etedi jáne qajetti ruqsat qujattarynsyz eńbek qyzmetine tartady.

Máselen, Almaty oblysynda kóshi-qon zańnamasyn buzǵan sheteldikterge turǵyn úı berip, zańsyz kóshi-qondy uıymdastyrdy degen kúdikpen Qazaqstan azamaty ustaldy. Osyndaı faktiler Jambyl jáne Pavlodar oblystarynda da anyqtaldy.

Operatsııa barysynda sheteldik jumys kúshin zańsyz paıdalanýdyń jolyn kesýge erekshe nazar aýdaryldy.

Máselen, Shymkent qalasyndaǵy qurylys nysandarynyń birinde tıisti ruqsattarsyz eńbek qyzmetin júzege asyrǵan 40-qa jýyq shetel azamaty anyqtaldy.

Osyndaı zań buzýshylyqtar Almaty qalasynda, sondaı-aq Qaraǵandy, Almaty, Atyraý, Mańǵystaý, Shyǵys Qazaqstan, Qostanaı jáne Soltústik Qazaqstan oblystarynda da tirkeldi. Barlyq jaǵdaıda sheteldik jumysshylar men jumys berýshilerge qatysty zańnamada kózdelgen sharalar qabyldandy.

— Budan bólek, bir jyl ishinde sheteldik jumys kúshin tartýdyń belgilengen tártibin eki nemese odan da kóp ret buzǵan 10 jumys berýshige qatysty tergep-tekserý bastaldy. Qaıtalanǵan quqyq buzýshylyqtar úshin olarǵa Qazaqstan Respýblıkasynyń zańnamasyna sáıkes qylmystyq jaýapkershilik kózdelgen, — dep habarlady Іshki ister mınıstrligi.

Sondaı-aq qoǵamdyq tártipti júıeli túrde buzatyn jáne elde belgilengen minez-qulyq normalaryn qurmettemeıtin shetel azamattaryna erekshe nazar aýdaryldy.

Atap aıtqanda, kóshi-qon zańnamasyn buzýǵa qatysy joq, alaıda birneshe ret ózge de quqyq buzýshylyqtar jasaǵan, sonyń ishinde balaǵat sózder aıtyp, qoǵamdyq tártipti buzǵan adamdar týraly sóz bolyp otyr.

Mundaı azamattardy Qazaqstan aýmaǵynan shyǵarý týraly polıtsııa sottarǵa 31 ótinishhat joldady. Tıisti sharalardy qoldaný bastamasy Shymkent qalasynda, Almaty qalasynda, sondaı-aq Abaı, Aqtóbe, Almaty, Mańǵystaý, Qostanaı jáne Túrkistan oblystarynda kóterildi.

Eger sottar elden shyǵarý týraly sheshim qabyldasa, atalǵan shetel azamattaryna Qazaqstan aýmaǵyna bes jyl merzimge kirýge tyıym salynady.

Polıtsııa kóshi-qon zańnamasyn buzýshylyqtardyń aldyn alý jáne jolyn kesý, zańsyz kóshi-qon arnalarynyń jolyn anyqtaý, sondaı-aq quqyqqa qaıshy áreketterge yqpal etetin adamdardy jaýapkershilikke tartý baǵytyndaǵy júıeli jumystardy jalǵastyryp jatyr.

Eske salaıyq, buǵan deıin 2027 jylǵy 1 shildeden kóship kelýshilerge Qazaqstanǵa kirý úshin elektrondyq ruqsat alý mindetti bolatynyn habarlaǵanbyz.