Elimizdegi jumys berýshiler kóbine qandaı mamandardy izdeıdi
ASTANA. KAZINFORM- 2026 jyldyń toǵyz aıynda jumys izdeýshiler Enbek.kz elektrondy eńbek bırjasyna 1,2 mıllıonǵa jýyq túıindeme ornalastyrǵan. Bul ótken jyldyń osy kezeńimen salystyrǵanda 2%-ǵa kóp.
QR Eńbek jáne halyqty áleýmettik qorǵaý mınıstrligi baspasóz qyzmetiniń habarlaýynsha, jumys berýshiler kóbine medbıkelerdi, avtokólik júrgizýshilerin, tárbıeshilerdi, matematıka muǵalimderin, býhgalterlerdi jáne aspazdardy izdegen.
Bos jumys oryndarynyń basym bóligi orta deńgeıdegi biliktiligi bar mamandarǵa arnalǵan. Olardyń úlesi – 42,1%. Joǵary bilikti mamandarǵa arnalǵan jumys oryndary 32,7%-dy, al arnaıy biliktilikti qajet etpeıtin jumystar 25,2%-dy quraıdy.
Sondaı-aq joǵary bilikti mamandardyń ishinde áleýmettik pedagogter men mektep psıhologtaryna da suranys bar.
Aıta keteıik, enbek.kz elektrondy eńbek bırjasy jumys izdeýshilerge túıindemesin ornalastyryp, ózine laıyqty jumys tabýǵa múmkindik beredi. Al jumys berýshiler platforma arqyly bos jumys oryndaryn usynyp, qoıylatyn kásibı talaptarǵa sáıkes keletin mamandardy irikteı alady.
-Elektrondy eńbek bırjasy jumys izdeý men qyzmetkerlerdi irikteý úderisterin bir tsıfrlyq platformada biriktiredi. Paıdalanýshylar óz talaptaryna sáıkes izdeý parametrlerin belgilep, elimizdiń túrli óńirlerindegi eńbek naryǵyndaǵy usynystarmen tanysa alady. Jumys múmkindikterin qarastyrý jáne túıindeme ornalastyrý úshin Enbek.kz platformasyn paıdalanýǵa bolady,-delingen habarlamada.
Qaı mamandyq ıesi qansha jalaqy alatyny týraly myna materıaldan oqyńyzdar.
