Elimizdegi jekemenshik balabaqshalardyń qyzmet kórsetý quny qansha
ASTANA. KAZINFORM – Jeke balabaqshalarda aı saıynǵy tólem 15 myń teńgeden bastalyp, jarty mıllıon teńgege deıin jetip tur. Bireý úshin bul qol jetpes qyzmet bolsa, ekinshi bir adamdar úshin qajettilik. Qaı qalada balabaqsha qyzmeti qymbat, al qaı óńirde baǵa qoljetimdi ekenin Kazinform agenttiginiń tilshisi anyqtap bildi.
Memlekettik balabaqshalarǵa qaraǵanda jekede toptaǵy bala sany az, túrli úıirmeler bar jáne sporttyq sektsııalar qyzmet kórsetedi. Ekinshi jaǵynan alyp qaraǵanda «bul qyzmettiń quny qansha» degen suraq týyndaıdy
Taǵy bir eskere ketetin jaıt, jeke balabaqshalardyń bir bóligi memlekettik tapsyrys aıasynda jumys isteıdi. Memleket shyǵynnyń bir bóligin óteıdi. Ony jergilikti ákimdik sheshedi. Búginde óńirlerde orta eseppen aı saıyn 14-17 myń teńgege shyǵyp tur. Degenmen qazir ata-analar memlekettik tapsyrysy joq balabaqshalardy tańdap, balasyn sonda tárbıeleıdi.
Balabaqsha qyzmeti Almaty men Astanada qymbat. Elimizdiń eki qalasynda jeke balabaqshalarda kórsetiletin qyzmet túri kóp. Tildi tereńdetip oqytyp, basseın, gımnastıka, bı jáne fýtbol men kúres úıirmelerin ashyp qoıǵan. Ata-analardy qyzyqtyrý úshin keıde shetelden oqytýshy aldyrtady nemese ataqty kásibı sportshylardy shaqyrady. Sonymen birge sýret salý, mýzyka men teatr ónerine baýlıtyn úıirmeler de bar. Mundaı balabaqshalar qyzmeti 50-60 myń teńgeden bastalyp, 500 myń teńgege deıin jetedi. Tanymal balabaqshalardaǵy ortasha baǵa 150-200 myń teńge.
Shymkentte jeke balabaqsha qyzmeti odan sál tómen. Orta eseppen — 142-150 myń teńge. Qaraǵandy men Jezqazǵanda tańdaý kóp ári balabaqshaǵa aı saıyn 45-100 myń teńge tóleýge bolady.
Óskemen men Semeıde jeke balabaqshaǵa aı saıyn 23,5 mtsń teńge tóleýge bolady. Keı jerde 135 myń teńgege jetedi. Qazir bul óńirlerde ortasha baǵa — 50-100 myń teńge.
Qostanaıda jeke tárbıeleý oryndary 45-95 myń teńge suraıdy. Al erekshe balalarǵa arnalǵan mamandandyrylǵan balabaqsha qyzmeti 120 myń teńgeden bastalady. Til úıretse 70 myń teńge, túrli úıirme men sektsııa qossa 140 myń teńge tóleıdi.
Atyraý, Kókshetaý, Pavlodarda ortasha baǵa 50-80 myń teńge. Keıbir tańdaýly balabaqsha 150 myń teńge jáne odan joǵary aqy de suraıdy. Aqmola oblysynda balabaqsha qyzmeti balanyń jasyna qaraı bólinedi. 2 jasqa tolmaǵan balany baǵyp-qaǵý 90 myń teńge shamasynda bolsa, mektep aldy daıarlyq tobynyń quny 75 myń teńge. Al 2-5 jas aralyǵyndaǵy balalarǵa balabaqsha quny 39,5 teńge bolyp tur.
Taldyqorǵan men Tarazda baǵa 40-50 myń teńgeden bastalǵanymen, kóbine 70 myń teńgeden aspaıdy. Úıirme men sektsııa bolsa da 100 myń teńge suraıdy. Aqtaý men Petropavlda aqysy joǵary balabaqsha 70 myń teńge bolsa, bul qalalardan aı saıynǵy tólemi 25-30 myń teńge bolatyn tárbıeleý ornyn taba alasyz. Qyzylordada jeke balabaqsha quny 40-50 myń teńge.
Aqtóbe, Qonaev pen Oralda baǵa 30-60 myń teńge aralyǵynda. Aqtóbede memlekettik tapsyrys alatyn balabaqshada aı saıynǵy tólem quny 16,8 myń teńge bolsa, taǵy bir balabaqshanyń qyzmet quny 214 myń teńge. Qonaevta qosymsha qyzmet túri joq qarapaıym jeke balabaqsha quny shamamen 70 myń teńge turady.
Elimizde jeke balabaqshalardyń qyzmet quny Túrkistanda arzan bolyp shyqty. Munda baǵa 15 myń teńgeden bastalyp, 60-70 myń teńgege deıin jetedi. Halyq sany endi-endi ǵana ósip kele jatqan óńir úshin bul eń tıimdi baǵa.
Aıta keteıik, bıyl balabaqshalar vaýcherlik qarjylandyrý júıesine ótedi.
Sondaı-aq mektepter men balabaqshalarǵa jańa sanıtarlyq talaptar engiziledi.