Elimizdegi jastar sany 6 mıllıonǵa jýyqtady
ASTANA. KAZINFORM – Qazaqstanda 6 mıllıonǵa jýyq jas azamat turady. Bul týraly Mádenıet jáne aqparat vıtse-mınıstri Evgenıı Kochetov Halyqaralyq jastar kúnine arnalǵan brıfıngte málimdedi.
Onyń aıtýynsha, búginde jastar el halqynyń shamamen úshten birin quraıdy. Osyǵan baılanysty jastar saıasaty bilim berý nemese jumyspen qamtýmen ǵana shektelmeı, birqatar mańyzdy baǵytty qamtıdy.
– Jastar saıasaty – tek óskeleń urpaqqa ǵana qatysty másele emes, tutas eldiń búgini men keleshegin aıqyndaıtyn mańyzdy baǵyt. Ol bilim berý, eńbek naryǵy, turǵyn úı, otbasy, kásipkerlik, jańa tehnologııalar, mádenıet, kreatıvti ındýstrııalar, óńirlerdi damytý jáne azamattyq belsendilik sekildi mańyzdy baǵyttardy qamtyp otyr, - dedi vıtse-mınıstr.
Keıingi jyldary jastar saıasaty salasynda birqatar ózgeris engizildi. Sonyń biri – jastar sanatyna jatatyn azamattardyń jas shegin 35 jasqa deıin ulǵaıtý.
– Sonyń nátıjesinde memlekettik qoldaý sharalaryna qatysa alatyn azamattar qatary keńeıdi. Qazir elimizde 2023-2029 jyldarǵa arnalǵan memlekettik jastar saıasatynyń tujyrymdamasy júzege asyrylyp jatyr. Ony iske asyrý josparyna 80-nen astam is-shara men joba engizildi, - dedi spıker.
Sonymen qatar júrgizilgen zertteý jastardyń basym bóligi eldiń bolashaǵyna oń kózqaraspen qaraıtynyn kórsetken. «Jastar» ǵylymı-zertteý ortalyǵynyń deregine sáıkes, qazaqstandyq jastardyń 82,7 paıyzy el bolashaǵyna senimmen qaraıdy.
– Endigi mindet – jastardyń osy senimin naqty múmkindiktermen ushtastyrý. Ol úshin sapaly bilim alýǵa, jumysqa ornalasýǵa, baspanaly bolýǵa, kásip bastaýǵa jáne óz qabiletin júzege asyrýǵa jaǵdaı jasaý kózdelip otyr, - dedi Evgenıı Kochetov.
Aıta keteıik, buǵan deıin Almatyda jastardyń ıdeıalaryn júzege asyrýǵa múmkindik beretin «Jastar qatysatyn bıýdjet» jobasy iske qosylatyny habarlandy.
