Elimizdegi vokzaldardy jańǵyrtýǵa 100 mlrd teńge jumsalady
ASTANA. KAZINFORM — Jańǵyrtý jumystary 124 vokzalda júrgizilip jatyr. Bul jóninde «Qazaqstan temir joly» UK» AQ basqarma tóraǵasynyń orynbasary Murat Tóregeldın Úkimet otyrysynan keıingi baspasóz konferentsııasynda málimdedi.
— Qazir 124 vokzal keń kólemde jańǵyrtylyp jatyr. Bul jumystar bastalǵanǵa deıin tehnıkalyq aýdıt júrgizildi. Nátıjesinde, 37 vokzaldy buzý qajettigi anyqtaldy. Sonymen qatar, vokzaldardyń 80%-ynyń qoldaný merzimi ótip ketken. Sondyqtan olar da jańǵyrtý baǵdarlamasyna engizildi. Bul jumystardyń aıasynda eski ǵımarattar jóndelip, jańa nysandar salynyp qana qoımaıdy, sonymen birge, negizgi platformalar jáne baılanys júıeleri jóndeledi. Odan bólek, qurylǵylar men jıhazdardy aýystyrý máselesi bar, — dedi ol.
Sondaı-aq, Murat Tóregeldın 124 vokzaldy jańǵyrtýǵa shamamen 100 mlrd teńge jumsalatynyn atap ótti. Bul qarjy eýro oblıgatsııalar arqyly qaryzǵa alynǵan.
Aıta keteıik, buǵan deıin áıelder vagondarymen 860 myń jolaýshy tasymaldanǵanyn jazǵanbyz.
